اسلام آباد۔6مارچ (اے پی پی):وزیراعظم عمران خان کی طرف سے پیش کردہ مراعاتی پیکج کے بعد اٹلی کے سرمایہ کاروں کا اعلیٰ سطحی وفد مشترکہ منصوبوں کے ذریعے غیر ملکی سرمایہ کاری کی راہیں تلاش کرنے کے لیے ایمیلیو گورینی کی قیادت میں پاکستان کا دورہ کرے گا۔
اٹلی کے شہر میلان میں حکومت پاکستان کے اعزازی سرمایہ کاری قونصلر محمد شہریار خان نے ورچوئل کانفرنس کے ذریعے چیئرمین یوکے پاکستان بزنس کونسل میاں کاشف اشفاق سے گفتگو کرتے ہوئے کہا کہ اعلیٰ درجے کے فرنیچر مینوفیکچررز اور عالمی معیار کے فرنیچر ڈیزائنرز دورے کے دوران میاں کاشف اشفاق جو پاکستان فرنیچر کونسل کے چیئرمین بھی ہیں سے ملاقات کریں گے اور سرمایہ کاری کے فروغ کے لیے اعلیٰ سطحی ملاقاتیں بھی کریں گے۔
محمد شہریار خان نے کہا کہ اس دورے کو کامیاب بنانے کے لیے وہ خود وفد کے ہمراہ ہوں گے۔ میاں کاشف اشفاق نے کہا کہ اٹلی بین الاقوامی معیارات پر پورا اترنے کے لیے پاکستان کے ساتھ فیشن انڈسٹری میں اپنی مہارت شیئر کر سکتا ہے اور دونوں ممالک کے درمیان تعاون کے وسیع مواقع موجود ہیں۔ انہوں نے کہا کہ اطالوی فیشن اور ٹیکسٹائل کا شعبہ دنیا بھر میں مقبول ہے اور فیشن انڈسٹری میں تعاون پاکستان کی ٹیکسٹائل انڈسٹری کے ڈیزائنوں کو بین الاقوامی مارکیٹ کے نئے رجحانات کے مطابق بہتر بنانے اور پاکستان میں لکڑی کا کام کرنے والے کارکنوں کو جدید تربیت فراہم کرنے میں اہم کردار ادا کر سکتا ہے۔
میاں کاشف نے کہا کہ وفد کو مختلف فرنیچر فیکٹریوں کا دورہ اور مینوفیکچررز کے ساتھ ملاقاتیں کروائی جائیں گی، اس کے علاوہ لاہور میں چن ون آئو ٹ لیٹ کا دورہ بھی کرایا جائے گا تاکہ انہیں پاکستان میں ہاتھ سے تیار کردہ بہترین مصنوعات دکھائی جا سکیں جن کی دنیا بھر میں بہت مانگ ہے۔
