اسلام آباد۔20اگست (اے پی پی):وزیر اعظم محمد شہباز شریف نے پائلٹ آفیسر راشد منہاس نشانِ حیدر کے 53ویں یومِ شہادت پر انہیں خراجِ عقیدت پیش کرتے ہوئے کہا ہے کہ پائلٹ آفیسر راشد منہاس کی فرض شناسی، ہمت و بہادری اور وطن کی حفاظت کے عہد کی پاسداری نوجوان نسل کیلئے ایک مثال ہے۔
منگل کو وزیراعظم آفس کے میڈیا ونگ سے جاری بیان کے مطابق وزیراعظم نے کہا کہ پائلٹ آفیسر راشد منہاس نشان حیدر نے جرأت و بہادری کی عظیم مثال قائم کرتے ہوئے جامِ شہادت نوش کیا،پائلٹ آفیسر راشد منہاس نشان حیدر نے اپنی جان کی قربانی دے کر ملک دشمن غدار کے ناپاک عزائم کو خاک میں ملا دیا۔
وزیراعظم نے کہا کہ پائلٹ آفیسر راشد منہاس نشانِ حیدر کی فرض شناسی، ہمت و بہادری اور وطن کی حفاظت کے عہد کی پاسداری نوجوان نسل کیلئے ایک مثال ہے،مجھ سمیت پوری قوم پاک فضائیہ کے اس بہادر سپوت کو سلام پیش کرتی ہے۔وزیراعظم نے کہا کہ قوم افواجِ پاکستان کے جوانوں و افسران کی مادر وطن کی حفاظت کیلئے قربانیوں کو کبھی فراموش نہیں کر سکتی۔
Short Link: https://urdu.app.com.pk/urdu/?p=495697
