وزیر اعلی سندھ سید مراد علی شاہ کی وفاقی وزیربرائے آئی ٹی شزا فاطمہ خواجہ سے ملاقات

کراچی۔ 28 اگست (اے پی پی):وزیر اعلی سندھ سید مراد علی شاہ نے جمعہ کو وفاقی وزیر برائے انفارمیشن ٹیکنالوجی اینڈ ٹیلی کمیونیکیشن شزا فاطمہ خواجہ سے ملاقات کی اور ڈیجیٹل نیشن پاکستان فریم ورک، نیشنل ڈیجیٹل کمیشن (این ڈی سی)، نیشنل ڈیجیٹل ماسٹر پلان، ڈیٹا گورننس، مصنوعی ذہانت اور سندھ کے ڈیجیٹل اقدامات کو قومی ڈیجیٹل ایجنڈے کے ساتھ ترتیب دینے پر تبادلہ خیال کیا۔ وفاقی وزیر کے ہمراہ وفاقی سیکرٹری آئی ٹی اینڈ ٹیلی کام ضرار ہاشم خان، پاکستان ڈیجیٹل اتھارٹی (پی ڈی اے) کے چیئرمین ڈاکٹر سہیل منیر اور سی ای او اگنائٹ بلال عباسی بھی تھے۔ وزیراعلی کی معاونت ان کے معاون خصوصی برائے آئی ٹی علی راشد، سیکرٹری وزیراعلی آصف جمیل، سیکرٹری آئی ٹی آغا سہیل اور سی ای او ایس آئی ٹی سی زین العابدین شاہ اور دیگر نے کی۔ وفاقی وزیر برائے آئی ٹی شزا فاطمہ خواجہ نے وزیر اعلی کو ڈیجیٹل نیشن پاکستان ایکٹ 2025 اور ڈیجیٹل سوسائٹی، ڈیجیٹل معیشت اور ڈیجیٹل گورننس ایکو سسٹم کی تعمیر کے وفاقی حکومت کے وژن پر بریفنگ دی۔ بریفنگ میں نیشنل ڈیجیٹل کمیشن کے کردار پر روشنی ڈالی گئی جس کی سربراہی وزیراعظم اور تمام صوبائی وزرائے اعلی پر مشتمل ہے اور پاکستان ڈیجیٹل اتھارٹی جو کہ نیشنل ڈیجیٹل ماسٹر پلان، ڈیجیٹل پبلک انفراسٹرکچر، ڈیٹا گورننس اور اے آئی فریم ورک کی تیاری کے لیے ذمہ دار ہے۔

وزیراعلی کو بتایا گیا کہ پاکستان پہلے ہی ملک بھر میں 100 سے زائد ڈیجیٹل پلیٹ فارمز قائم کر چکا ہے، جبکہ سندھ نے 50 سے زائد ڈیجیٹل اقدامات تیار کیے ہیں، جن میں ایس آر بی ای سروسز، سندھ زمین، ای پے سندھ، ای آفس، سندھ جاب پورٹل، سیف سٹی سسٹمز اور دیگر شہری مرکوز ڈیجیٹل سروسز شامل ہیں۔ وفاقی وزیر نے سرکاری اداروں کے درمیان زیادہ سے زیادہ باہمی تعائون، نیشنل ڈیٹا ایکسچینج لیئر (WASL) کے ذریعے انضمام اور صحت، زراعت، ہائوسنگ، مالیاتی خدمات اور تجارت سمیت اہم شعبوں میں ڈیجیٹل تبدیلی کو تیز کرنے کے لیے مربوط کوششوں کی ضرورت پر زور دیا۔سید مراد علی شاہ نے اس اقدام کا خیرمقدم کیا اور قومی ڈیجیٹل ایجنڈے کے لیے سندھ کی حمایت کا اعادہ کیا۔ انہوں نے کہا کہ سندھ وفاقی حکومت کے ساتھ مل کر کام کرے گا۔انہوں نے کہا کہ سندھ نیشنل ڈیجیٹل ماسٹر پلان کے مسودے کا جائزہ لے گا اور اپنا ان پٹ فراہم کرے گا۔ انہوں نے مزید کہا کہ صوبہ قومی مقاصد اور صوبائی ضروریات کے مطابق اپنا ڈیجیٹل ماسٹر پلان بھی تیار کرے گا۔وزیراعلی نے ڈیڈیکیٹڈ ڈیجیٹل، ڈیٹا اور اے آئی دفاتر کے ذریعے تمام محکموں میں ڈیجیٹل تبدیلی کو ادارہ جاتی بنانے کی تجویز کی حمایت کی اور اس بات پر اتفاق کیا کہ ڈیجیٹل گورننس، الیکٹرانک ریکارڈ، سائبر سیکیورٹی اور ٹیکنالوجی پر مبنی سروس ڈیلیوری کو ایڈجسٹ کرنے کے لیے رولز آف بزنس، پروکیورمنٹ کے طریقہ کار اور پلاننگ فریم ورک کو اپ ڈیٹ کیا جانا چاہیے۔

نیشنل ڈیٹا گورننس پالیسی اور WASL انضمام پر تبادلہ خیال کرتے ہوئے، وزیر اعلی نے محکمہ انفارمیشن سائنس اینڈ ٹیکنالوجی کو ہدایت کی کہ وہ پاکستان ڈیجیٹل اتھارٹی کے ساتھ رابطے جاری رکھیں اور متعلقہ صوبائی محکموں سے مکمل مشاورت کریں۔ میٹنگ ڈیجیٹل گورننس، پبلک سروس ڈیلیوری ریفارمز، آرٹیفیشل انٹیلی جنس، ڈیٹا گورننس اور ترجیحی سیکٹرل ڈیجیٹل ٹرانسفارمیشن اقدامات کے نفاذ پر وفاق اور صوبائی کوآرڈینیشن کو مضبوط بنانے کے معاہدے کے ساتھ اختتام پذیر ہوئی۔