اسلام آباد ۔ یکم مارچ(اے پی پی) وزیر خارجہ مخدوم شاہ محمود قریشی نے پارلیمان کے مشترکہ اجلاس میں اظہار یکجہتی اور مشترکہ قرارداد پر اتفاق رائے پر تمام پارلیمانی رہنماﺅں کا شکریہ ادا کیا ہے۔ جمعہ کو پارلیمنٹ ہاﺅس کے باہر پارلیمان کے مشترکہ اجلاس میں پیش کی جانے والی متفقہ قرارداد کے حوالے سے میڈیا سے خصوصی گفتگو کرتے ہوئے انہوں نے کہا کہ پارلیمان کا دل کی اتھاہ گہرائیوں سے شکریہ ادا کرنا چاہتا ہوں خاص طور پر قائد حزبِ اختلاف اور باقی پارٹیوں کے قائدین کا جنہوں نے پارلیمنٹ کے مشترکہ اجلاس میں یکجہتی کا اظہار کیا اور مشترکہ قرارداد پر اتفاق کیا۔ انہوں نے کہا کہ ہماری اس مشترکہ قرارداد کے حوالہ سے تمام پارلیمانی پارٹیوں کے ساتھ نشست ہوئی جس میں پاکستان مسلم لیگ (ن) کی طرف سے گوجرانوالہ سے ایم این اے غلام دستگیر خان اور پیپلز پارٹی کی نمائندگی نوید قمر نے کی،دیگر جماعتوں کے ساتھ مشاورت کے بعد اس مشترکہ قرارداد پر اتفاق رائے کیا گیا۔ انہوں نے کہا کہ یہ قرارداد پارلیمنٹ کے مشترکہ اجلاس میں اراکین کی تقاریر کے بعد پیش کر دی جائے گی۔ اس قرارداد میں امن، کشمیریوں کے ساتھ یکجہتی کے اظہار، بھارتی جارحیت کے خلاف قومی عزم کا پیغام ہے اور اس میں پاکستان کا نقطہ نظر بھی ہے۔ انہوں نے کہا کہ یہ ایک بہت انتہائی خوش آئند پیشرفت ہے جس پر میں پوری پارلیمنٹ کو مبارکباد پیش کرتا ہوں،یہ وہ قرارداد ہے جس پر تمام نمائندوں نے دستخط کئے ہیں۔
