وزیر دفاع خواجہ محمد آصف نے سیالکوٹ میں اربوں روپے کے میگا ترقیاتی منصوبوں کا افتتاح کر دیا

سیالکوٹ۔ 05 اپریل (اے پی پی):وزیر دفاع خواجہ محمد آصف نے ضلع بھر کے لیے اربوں روپے کے میگا ترقیاتی منصوبوں کا افتتاح کر دیا۔ افتتاحی تقریب کے موقع پر میڈیا سے گفتگو کرتے ہوئے وزیر دفاع خواجہ محمد آصف نے کہا کہ وزیر اعلی پنجاب مریم نواز کی خصوصی توجہ سے شہر میں ترقیاتی کاموں کا پیکج دیا گیا ہے،آئندہ تین سالوں میں شہر اقبال کی شکل و صورت میں واضح تبدیلی آئے گی۔ انہوں نے کہا کہ یہ ترقی کا سفر مریم نواز کی قیادت میں جاری رہےگا،آئندہ الیکشن میں ایک ایسا رپورٹ کارڈ لے کر آئیں گے جس میں ملک کی ترقی کی راہوں پر گامزن ہو گا۔وزیر دفاع نے بھارت کو واضح پیغام دیتے ہوئے کہا کہ بھارت بوکھلاہٹ کا شکار ہے، بھارت حواس باختہ ہو چکا ہے،بھارت نے پہلگام جیسا فالس فلیگ آپریشن کیا تو ہم کلکتہ تک پہنچا کر آئیں گے۔

وزیر دفاع خواجہ محمد آصف نے ترقیاتی منصوبوں کے حوالے سے بتایا کہ اس پیکج میں اقبال منزل کے اطراف 16 ارب روپے سے زائد کی لاگت کا تزئین و آرائش کا منصوبہ بھی شامل ہے، جبکہ شہر کی صفائی اور نظام کی بہتری کے لیے 64 کروڑ روپے کی جدید مشینری کی منظوری دے دی گئی ہے۔گزشتہ سال سیلاب سے ہونے والی تباہی کے پیش نظر شہر کے نالوں کی تعمیرِ نو کا کام تیزی سے جاری ہے تاکہ سیالکوٹ کو مستقل طور پر محفوظ بنایا جا سکے۔ تاریخی ورثے کی بحالی کے لیے قلعہ سیالکوٹ پر 30 کروڑ کی لاگت سے پارک جبکہ اقبال منزل کی اپ گریڈیشن پر 10 کروڑ روپے خرچ کیے جائیں گے۔

شہر میں 380 ڈسپوزل اسٹیشنز کی تعمیر سے نکاسی آب کے مسائل بھی حل ہوں گے۔وزیر دفاع نے مشرق وسطیٰ کی صورتحال پر تشویش کا اظہار کرتے ہوئے کہا کہ ایران اسرائیل جنگ کے اثرات سے بچنے کے لیے بڑے فنڈز کی ضرورت پڑے گی۔