اسلام آباد۔18مارچ (اے پی پی):وفاقی سیکرٹری اطلاعات و نشریات عنبرین جان اور پرنسپل انفارمیشن آفیسر مبشر حسن نے نیشنل پریس کلب کے نومنتخب صدر اظہر جتوئی، سیکرٹری نیئر علی، سیکرٹری خزانہ وقار عباسی سمیت دیگر نومنتخب عہدیداران کو مبارکباد دیتے ہوئے ان کے لئے نیک تمنائوں کا اظہار کیا ہے۔
منگل کو اپنے بیان میں وفاقی سیکرٹری اطلاعات عنبرین جان نے کہا کہ نیشنل پریس کلب پاکستان میں صحافتی برادری کے لئے ایک موثر پلیٹ فارم ہے جو آزادی صحافت اور صحافیوں کے حقوق کے لئے مسلسل کوشاں ہے۔ انہوں نے اس امید کا اظہار کیا کہ نومنتخب قیادت اپنی صلاحیتوں کو بروئے کار لاتے ہوئے صحافیوں کی فلاح و بہبود اور میڈیا کی ترقی کے لئے موثر اقدامات اٹھائے گی۔
پرنسپل انفارمیشن آفیسر مبشر حسن نے کہا کہ جدید دور کے چیلنجز کے پیش نظر آزاد، ذمہ دار اور حقائق پر مبنی صحافت کا فروغ وقت کی ضرورت ہے۔ ہمیں یقین ہے کہ نیشنل پریس کلب اس حوالے سے اپنی شاندار روایات کو برقرار رکھے گا۔
وفاقی سیکرٹری اطلاعات اور پرنسپل انفارمیشن آفیسر نے کہا کہ وزارت اطلاعات و نشریات نیشنل پریس کلب اور صحافتی برادری کے ساتھ ہر ممکن تعاون جاری رکھنے کے لئے پرعزم ہے، امید ہے نئی قیادت نیشنل پریس کلب کو مزید فعال اور موثر بنانے میں کلیدی کردار ادا کرے گی۔
Short Link: https://urdu.app.com.pk/urdu/?p=573735
