اسلام آباد ۔ 29 جولائی (اے پی پی) وفاقی وزیر برائے منصوبہ بندی، ترقی و خصوصی اقدامات اسد عمر نے کہا ہے کہ موجودہ حکومت نے بلوچستان کے نہری نظام اور ڈیمز کی تعمیر و توسیع کے لئے بڑے بڑے منصوبے شروع کر رکھے ہیں اور نولنگ ڈیم اس میں ایک اضافہ ہے، ان منصوبوں سے بلوچستان میں پانی کے مسئلے کو حل کرنے میں مدد ملے گی۔ان خیالات کا اظہار انہوں نے بدھ کوبلوچستان کے آبی منصوبوں میں پیش رفت اور نولنگ ڈیم ہر خصوصی بریفنگ کے دوران کیا۔ بریفنگ میں ڈپٹی چئیرمین پلاننگ کمیشن محمد جہانزیب خان، سیکرٹری پلاننگ مطہر نیاز رانا، سیکریٹری محکمہ آبپاشی بلوچستان اور سینئیر عہدیداروں نے ویڈیو کانفرنس کے ذریعے شرکت کی۔ اجلاس میں 28 ارب روپے کی لاگت کے نولنگ ڈیم کی تعمیر شروع کرنے کی ہدایات دی۔ بلوچستان میں نولنگ ڈیم دریائے مولا پر ضلع جھل مگسی میں سنت کے مقام پر بنایا جائے گا۔
