وفاقی وزیر تجارت جام کمال خان کا ڈیجیٹل دور کے تقاضوں کے مطابق گورننس میں اصلاحات اور تنظیمِ نو پر زور

اسلام آباد۔1اگست (اے پی پی):وفاقی وزیر تجارت جام کمال خان نے کہا ہے کہ گورننس کے نظام میں اصلاحات اور تنظیمِ نو ہی آگے بڑھنے کا واحد راستہ ہے اور ڈیجیٹل رفتار کے اس نئے دور میں اس کی ضرورت پہلے سے کہیں زیادہ بڑھ گئی ہے۔سماجی رابطے کی ویب سائٹ ایکس پر اپنے پیغام میں وزیر تجارت نے کہا گورننس ماڈل میں اصلاحات اور تنظیمِ نو ہی آگے بڑھنے کا واحد راستہ ہے اور ڈیجیٹل رفتار کے اس نئے دور میں اس کی ضرورت پہلے سے کہیں زیادہ ہے۔

وزیر تجارت نے اس پیغام کے ساتھ 5 اگست 2018 کو کی گئی اپنی ایک سابقہ پوسٹ بھی شیئر کی، جس میں انہوں نے بلوچستان میں گورننس کے ڈھانچے کی کمزوریوں کی نشاندہی کرتے ہوئے مؤثر، فعال اور عوامی خدمت پر مبنی حکومتی نظام کی ضرورت پر زور دیا تھا۔جام کمال خان نے اپنے سابقہ اور موجودہ مؤقف کو یکجا کرتے ہوئے اس بات کا اعادہ کیا کہ مؤثر طرزِ حکمرانی، ادارہ جاتی اصلاحات، تنظیمِ نو اور عوامی خدمت کے مؤثر نظام کے بغیر ممکن نہیں، خصوصاً ایسے دور میں جہاں تیز رفتار ڈیجیٹل تبدیلیاں نئے تقاضے سامنے لا رہی ہیں۔