اسلام آباد۔6دسمبر (اے پی پی):وفاقی وزیر خزانہ اسحاق ڈار سے سری لنکا کے وزیر مملکت برائے خزانہ ایچ ای مسٹر شیہان سیماسنگھے اورڈپٹی سیکرٹری خزانہ مسٹر پریانتھا رتھنایکا نے منگل کو فنانس ڈویژن میں ملاقات کی ۔اس موقع پر ایس اے پی ایم برائے خزانہ طارق باجوہ اور فنانس ڈویژن کے دیگر سینئر افسران نے اجلاس میں شرکت کی۔ وزیر خزانہ نے وفد کا خیرمقدم کیا اور پاکستان کے مجموعی اقتصادی نقطہ نظر سے آگاہ کیا۔
وزیر خزانہ نے سیلاب کے بعد جاری تعمیر نو اور بحالی کے پروگرام کے بارے میں بھی آ گاہ کیا اور بتایا کہ موجودہ حکومت کی عملی پالیسیوں کی وجہ سے پاکستان کی معیشت نے تباہ کن سیلاب کے بحران کے منفی اثرات کا سختی سے سامنا کیا ہے۔ سری لنکا کے وزیر خزانہ نے سری لنکا کی معاشی صورتحال سے آگاہ کیا اور بتایا کہ سری لنکا اس وقت بڑے معاشی بحران کا شکار ہے۔
انہوں نے پاکستان میں بی آئی ایس پی کی شکل میں اچھی طرح سے مستحکم اور مکمل طور پر منظم ڈیجیٹل کیش ٹرانسفر سسٹم اور سوشل سیفٹی نیٹ کی تعریف کی۔ وزیر خزانہ نے پیشکش کی کہ پاکستان سری لنکا کو تکنیکی معاونت اور استعداد کار میں اضافے کے حوالے سے کوئی بھی مدد فراہم کرنے پر خوش ہو گا۔
وزیر خزانہ نے نیک خواہشات کا اظہار کیا اور بحران کی اس گھڑی میں سری لنکا کے وزیر مملکت برائے خزانہ ایچ ای مسٹر شیہان سیماسنگھے کو مکمل حمایت اور تعاون کی پیشکش کی۔ سری لنکا کے وزیر خزانہ نے وفاقی وزیر خزانہ اور ریونیو سینیٹر محمد اسحاق ڈار کی حمایت اور خیر سگالی پر شکریہ ادا کیا۔
