اسلام آباد۔31اگست (اے پی پی):وفاقی وزیر داخلہ محسن نقوی کی زیر صدارت خصوصی کمیٹی برائے آئی این جی اوز کا اجلاس ہفتہ کو یہاں وزارت داخلہ میں ہوا۔اجلاس میں ایڈیشنل سیکرٹری وزارت داخلہ، ایڈیشنل سیکرٹری اقتصادی امور ڈویژن، ڈی جی وزارت خارجہ، کنسلٹنٹ وزارت قانون اور دیگر متعلقہ افسران نے شرکت کی۔
اجلاس کے دوران آئی این جی اوز کی رجسٹریشن مسترد کرنے اور ایم او یوز کی تجدید سے متعلق درخواستوں کا جائزہ لیا گیا۔
اس موقع پر وفاقی وزیر نے کہا کہ ہر درخواست کا تفصیلی جائزہ لیا جائے گا اور آئی این جی اوزکے تمام متعلقہ دستاویزات کی جانچ کی جائے گی۔ انہوں نے مزید کہا کہ آئی این جی اوز بھی وزارت داخلہ کے ساتھ تعاون کریں اور متعلقہ دستاویزات بروقت فراہم کریں۔
انہوں نے کہا کہ اسکروٹنی کا عمل 15 دنوں میں مکمل کر لیا جائے گا اور اس کے مطابق تمام درخواست دہندگان کو آگاہ کر دیا جائے گا۔
Short Link: https://urdu.app.com.pk/urdu/?p=499202
