اسلام آباد۔17اپریل (اے پی پی):وفاقی وزیر ریلوے محمد حنیف عباسی سے مسلم لیگ (ن) کی رہنما طاہرہ اورنگزیب نے جمعرات کو یہاں ملاقات کی۔ طاہرہ اورنگزیب نے وفاقی وزیر کو ان کی حالیہ تقرر پر دلی مبارکباد دی اور پاکستان ریلوے کے کامیاب آپریشن اور ترقی کے لئے نیک تمناؤں کا اظہار کیا۔ انہوں نے یہ بھی امید ظاہر کی کہ حنیف عباسی کی قیادت میں پاکستان ریلوے مزید ترقی کرے گا، اس کی خدمات میں بہتری آئے گی اور ریلوے کا نظام مزید مستحکم ہوگا۔
دونوں رہنماؤں نے پاکستان ریلوے کے مستقبل کے حوالے سے مختلف امور پر تبادلہ خیال کیا جس میں ریلوے میں جدت ، مسافروں کی حفاظت اور ریلوے نیٹ ورک کی توسیع کی ضرورت پر زور دیا گیا۔ وفاقی وزیر نے کہا کہ چیلنجز موجود ہیں تاہم حکومت ریلوے کو بہتر بنانے کے لئے بھرپور اقدامات کر رہی ہے تاکہ ملک کی معیشت اور ٹرانسپورٹیشن سسٹم میں بہتری آئے۔طاہرہ اورنگزیب نے گزشتہ روز شٹل ٹرین کے شاندار افتتاح پر وزیر ریلوے کو خراج تحسین پیش کیا اور عوام کو سفر کی بہترین سہولیات دینے کے ان کے عزم کو سراہا۔
وفاقی وزیر نے طاہرہ اورنگزیب کے پاکستان ریلوے کی ترقی کے لئے مسلسل تعاون کو سراہا ۔
Short Link: https://urdu.app.com.pk/urdu/?p=583557
 کی رہنما طاہرہ اورنگزیب کی ملاقات){kind=link}