وژن 2030 کے تحت سمارٹ مکہ ہیکاتھون انیشیٹو کا آغاز

ریاض ۔30جولائی (اے پی پی):مکہ مکرمہ و مشاعر مقدسہ رائل کمیشن نے سرکاری و نجی شعبے کے تعاون سے مملکت کے وژن 2030 کے اہداف کے تحت سمارٹ مکہ ہیکاتھون اقدام کا آغاز کر دیا ہے۔اردو نیوز کے مطابق اقدام کا مقصد مصنوعی ذہانت اور جدید ٹیکنالوجی کے استعمال کو بہتر بناتے ہوئے رہائشیوں اور زائرین کو بہتر سے بہتر خدمات فراہم کرنا ہے۔رائل کمیشن اتھارٹی نے کہا کہ یہ اقدام مختلف مراحل پر مشتمل ہو گا جس کا ابتدائی مرحلہ مصنوعی ذہانت کے پروگراموں کی تربیت فراہم کرنا ہے تاکہ سمارٹ سلوشنز کو جلد قابل عمل بنایا جائے۔

سمارٹ مکہ ہیکاتھون کے حوالے سے اتھارٹی نے بتایا کہ رواں سال میں مکہ مکرمہ کی مختلف شہری ترقی کی ترجیحات کی عکاسی کی جائے گی جن میں سرفہرست شہری منصوبہ بندی شامل ہے۔سمارٹ تکنیکی صلاحیتوں کو بروئے کار لاتے ہوئے خاص کر مختلف سیزن (عمرہ اور حج ) میں شہری امور کو آسان بنانے کے لیےجامع منصوبوں کو پیش کیا جائے گا۔اتھارٹی نے یقین دہانی کی کہ ہیکاتھون منفرد افکار و آرا کو پیش کرنے کا اوپن پلیٹ فارم ہوگا جن پرعمل کرتے ہوئے مستقبل کے تقاضوں سے ہم آہنگ بہترین سہولیات کی فراہمی کو یقینی بنایا جا سکے۔