ٹی ٹوئنٹی بلائنڈ کرکٹ ورلڈکپ کے پہلے روز پاکستان اور سری لنکا کی ٹیموں نے اپنے اپنے میچز جیت لئے

لاہور۔23نومبر (اے پی پی):پاکستان بلائنڈ کرکٹ کونسل کے زیراہتمام چوتھے ٹی ٹوئنٹی بلائنڈ کرکٹ ورلڈکپ کے پہلے روز پاکستان اور سری لنکا کی ٹیموں نے اپنے اپنے میچز جیت لئے۔ہفتہ کوغنی انسیٹیوٹ کرکٹ گراؤنڈ ڈی ایچ اے پر ساؤتھ افریقہ نے پاکستان کیخلاف ٹاس جیت کرپہلے بیٹنگ کا فیصلہ کیا اور مقررہ 20 اوورز میں 7 وکٹوں کے نقصان پر 129 بنائے ،لیسیدی لیسوفل نے 24 اور ایڈریچ ٹرہا نے 17 رنز بنائے۔ بابر علی نے 2 کھلاڑیوں کو آؤٹ کئے۔ جواب میں پاکستان نے مطلوبہ ہدف 10.3 اوورز میں 2 وکٹوں کے نقصان پر مکمل کرلیا ،اوپنر نعمت اللہ نے شاندار بیٹنگ کا مظاہرہ کرتے ہوئے 9 چوکوں اور ایک چھکے کی مدد سے 31 بالز پر 59 رنز سکور کئے ،ظفر نے 33 رنز بنائے۔ پاکستان کیجانب سے طلحہ (بی تھری کیٹیگری) نے اپنا ڈبیو کیا۔

سعید اسپورٹس سٹی میں کھیلے گئے دوسرے میچ میں سری لنکا نے نیپال کیخلاف 70 رنزسے کامیابی حاصل کرلی۔ نیپال نے ٹاس جیت کر سری لنکا کو پہلے کھیلنے کی دعوت دی۔ سری لنکا نے 20 اوورز میں 4 وکٹوں کے نقصان پر 195 رنز بنائے ،سری لنکن اوپنر دمیت سانداروان نے عمدہ بیٹنگ کرتے ہوئے ورلڈ کپ کی پہلی سنچری بنانے کا اعزاز حاصل کیا وہ 100 رنز بنا کرناٹ آؤٹ رہے ،مدھو ونتا نے 23 رنز کی اننگز کھیلی۔ جواب میں نیپال کی ٹیم مقررہ اوورز میں 8 وکٹوں کے نقصان پر 125 رنز بنا سکی ،درگا دتہ نے 24اور نریش نے 23 رنز بنائے۔کل اتوار کو غنی انسیٹیوٹ کرکٹ گراؤنڈ پر سری لنکا اور افغانستان جبکہ سعید اسپورٹس سٹی پر بنگلہ دیش اور نیپال کی ٹیمیں مدمقابل ہوں گی۔