پاکستان میں تعینات افغانستان کی کمرشل اتاشی محترمہ ثمینہ ودیرکا ہفتہ کو اسلام آباد چیمبر آف کامرس اینڈ انڈسٹری کا دورہ

اسلام آباد ۔ 10 اگست (اے پی پی)پاکستان میں تعینات افغانستان کی کمرشل اتاشی محترمہ ثمینہ ودیر نے ہفتہ کو اسلام آباد چیمبر آف کامرس اینڈ انڈسٹری (آئی سی سی آئی) کا دورہ کیا اورپاکستان و افغانستان کے درمیان کاروبار اور سرمایہ کاری کو فروغ دینے کے امور پر مقامی تاجر برادری کے ساتھ تبادلہ خیال کیا۔ اس موقع پر انہوں نے کہا کہ افغانستان کاروباری شعبے میں متعدد اصلاحات متعارف کرا رہا ہے تا کہ کاروباری سرگرمیوں کو فروغ ملے۔ انہوں نے کہا کہ افغانستان اس وقت دوبارہ بحالی کی طرف گامزن ہے جس وجہ سے تعمیراتی شعبے میں بہت سی سرگرمیاں جاری ہیں۔ انہوں نے کہا کہ افغانستان کے مختلف صوبوں میں 19 انڈسٹریل ایریاز قائم ہیں جبکہ انڈسٹریل پارک میں ایک مربع میٹر زمین کی قیمت صرف 50 افغانی ہے۔ انہوں نے کہا کہ افغانستان میں صنعتی مشینری کی درآمد پر کوئی ڈیوٹی عائد نہیں ہے جبکہ خام مال کی درآمد پر ٹیرف صرف ایک فیصد ہے لہذا پاکستان کے سرمایہ کاروں کیلئے یہ اچھا موقع ہے کہ وہ افغانستان میں سرمایہ کاری کے مواقع تلاش کریں۔ پاکستان کی تاجر وصنعتکار برادری کیلئے افغانستان میں زراعت، توانائی، معدنیات، فارماسوٹیکل، ٹیلی کمیونیکیشن اور قالین سازی کے شعبوں میں سرمایہ کاری کے عمدہ مواقع پائے جاتے ہیں۔ پاکستانی سرمایہ کار افغانستان میں سرمایہ کاری کر کے ان مواقع سے فائدہ اٹھائیں۔ انہوں نے کہا کہ افغانستان میں سرمایہ کاری کر کے پاکستان کے سرمایہ کار وسطی ایشیاء کی مارکیٹ تک بہتر رسائی حاصل کر سکتے ہیں۔ ثمینہ ودیر نے کہا کہ پاکستان نے افغانستان کے ساتھ طورخم کراسنگ پوائنٹ کو 24 گھنٹے کیلئے کھول کر ایک اچھا فیصلہ کیا ہے اور کہا کہ چمن کراسنگ پوائنٹ پر بھی یہ سہولت بحال کی جائے جس سے دوطرفہ تجارت بہتر ہو گی۔ انہوںنے کہا کہ افغانستان کی تاجر برادری کو پاکستان کی مارکیٹ کے بارے میں بہتر معلومات ہیں لیکن پاکستان کی تاجر برادری کو افغانستان کی مارکیٹ کے بارے میں بہت کم معلومات ہیں لہذا ضرورت اس امر کی ہے کہ وہ افغانستان کا دورہ کر کے وہاں اپنے لئے کاروبار کے مواقع تلاش کریں۔