پاکستان نے ایشیا کپ بلائنڈ ٹی ٹوئنٹی کرکٹ ٹورنامنٹ کا ٹائٹل اپنے نام کر لیا۔ پاکستان اور بھارت کے درمیان بنگلہ دیش میں کھیلا جانے والا فائنل میچ مسلسل بارش کے باعث ممکن نہ ہو سکا، جس کے بعد میچ ریفری نے ٹورنامنٹ کے قواعد و ضوابط اور لیگ مرحلے میں پاکستان کی شاندار کارکردگی کو مدنظر رکھتے ہوئے قومی ٹیم کو فاتح قرار دے دیا۔ پاکستانی ٹیم نے ایونٹ …
پاکستان نے بلائنڈ ٹی ٹوئنٹی کا ٹائٹل اپنے نام کر لیا

مزید خبریں
لاہور۔20نومبر (اے پی پی):پاکستان نے ایشیا کپ بلائنڈ ٹی ٹوئنٹی کرکٹ ٹورنامنٹ کا ٹائٹل اپنے نام کر لیا۔ پاکستان اور بھارت کے درمیان بنگلہ دیش میں کھیلا جانے والا فائنل میچ مسلسل بارش کے باعث ممکن نہ ہو سکا، جس کے بعد میچ ریفری نے ٹورنامنٹ کے قواعد و ضوابط اور لیگ مرحلے میں پاکستان کی شاندار کارکردگی کو مدنظر رکھتے ہوئے قومی ٹیم کو فاتح قرار دے دیا۔ پاکستانی ٹیم نے ایونٹ کے دوران مسلسل بہترین کھیل کا مظاہرہ کرتے ہوئے اپنی برتری ثابت کی اور لیگ مرحلے کے تینوں میچز میں کامیابی حاصل کی۔
پاکستان نے سری لنکا، بنگلہ دیش اور روایتی حریف بھارت کو شکست دے کر پوائنٹس ٹیبل پر پہلی پوزیشن حاصل کی تھی۔ یوں قومی ٹیم نے ناقابلِ شکست کارکردگی کے ساتھ فائنل تک رسائی حاصل کی اور بالآخر ایشیا کپ کی نئی چیمپئن بننے کا اعزاز حاصل کر لیا۔ پاکستان اور بھارت کے درمیان فائنل مقابلہ بارش کے باعث متاثر ہوا اور مسلسل بارش کے سبب میچ کا انعقاد ممکن نہ ہو سکا۔ صورتحال کا جائزہ لینے کے بعد میچ ریفری نے ٹورنامنٹ کے طے شدہ قوانین کے مطابق پاکستان کو فاتح قرار دیا۔ پاکستان ٹیم پوائنٹس، رن ریٹ اور ہیڈ ٹو ہیڈ ریکارڈ کے اعتبار سے بھی بھارتی ٹیم سے آگے تھی، جس کی بنیاد پر قومی ٹیم کے حق میں فیصلہ کیا گیا۔
ذرائع کے مطابق ٹورنامنٹ کے قواعد و ضوابط سات نومبر کو ہی تمام اراکین اور متعلقہ ٹیموں کو ارسال کر دیے گئے تھے، جن میں بارش یا کسی دوسری وجہ سے فائنل میچ نہ ہونے کی صورت میں فیصلہ کرنے کا طریقہ کار بھی واضح کیا گیا تھا۔ اسی طے شدہ طریقہ کار کے تحت پاکستان کو چیمپئن قرار دیا گیا۔ دوسری جانب بھارتی ٹیم نے فائنل کے بعد منعقد ہونے والی تقریب میں شرکت نہیں کی اور بائیکاٹ کرتے ہوئے سٹیڈیم سے روانہ ہو گئی۔ اس کے برعکس پاکستانی ٹیم نے تقریب میں شرکت کی اور ایشیا کپ کی ٹرافی وصول کی۔ ٹورنامنٹ کی اختتامی تقریب میں مہمان خصوصی ڈائریکٹر بنگلہ دیش کرکٹ بورڈ عبداللہ الفواد نے کھلاڑیوں میں انعامات تقسیم کیے۔
اس موقع پر ڈائریکٹر رنگپور رائیڈرز شہزاد اکبر سبحان اور بنگلہ دیش میں تعینات پاکستانی ہائی کمشنر عمران حیدر بھی موجود تھے۔ مہمانانِ خصوصی نے پاکستانی ٹیم کی کامیابی پر مبارک باد دی اور کھلاڑیوں کی کارکردگی کو سراہا۔ پاکستانی ٹیم کی اس کامیابی کو بلائنڈ کرکٹ کے میدان میں ایک اہم سنگ میل قرار دیا جا رہا ہے۔ قومی کھلاڑیوں نے پورے ٹورنامنٹ میں یکجہتی، محنت اور بہترین کھیل کا مظاہرہ کرتے ہوئے تینوں لیگ میچز جیتے اور پوائنٹس ٹیبل پر اپنی برتری برقرار رکھی۔پاکستان کی اس کامیابی سے نہ صرف قومی ٹیم نے ایشیا کپ کا ٹائٹل اپنے نام کیا بلکہ بلائنڈ کرکٹ میں پاکستان کی مضبوط حیثیت بھی ایک مرتبہ پھر نمایاں ہوئی۔







