پاکستان نے بنگلہ دیش کو شکست دے کر ٹی 20بلائنڈ کرکٹ ورلڈکپ میں مسلسل دوسری کامیابی حاصل کرلی،نیپال نے ساؤتھ افریقہ کو شکست دیدی

لاہور۔26نومبر (اے پی پی):پاکستان نے بنگلہ دیش بلائنڈ کرکٹ ٹیم کو8 وکٹوں سے شکست دے کر چوتھے بلائنڈ کرکٹ ورلڈ کپ میں اپنی مسلسل دوسری کامیابی حاصل کرلی۔منگل کو باغ جناح گراؤنڈ پر بنگلہ دیش نے ٹاس جیت کر پہلے بیٹنگ کرنے کافیصلہ کیا اور مقررہ 20 اوورز میں 6 وکٹوں کے نقصان پر 145 رنز بنائے محمد سلمان نے 31 بالز پر 43 اور تارف ریحان نے 32 بالز پر 30 رنز بنائے۔

جواب میں پاکستان نے مطلوبہ 146 رنز کا ہدف 12.4اوورز میں 2 وکٹوں کے نقصان پرمکمل کرلیا۔پاکستان کی جانب سے محمد صفدر نے 29 گینددں پر 41،نعمت اللہ نے 29 بالزپر 34 اوربدرمنیر نے صرف 9 بالز پر 28 ناٹ آؤٹ سکوربنایا۔ مہمان خصوصی صوبائی سیکرٹری سپورٹس پنجاب مظفرخان سیال نے چیئرمین پی بی سی سے سیدسلطان شاہ کے ہمراہ محمد سلمان کومیچ کا ایمرجنگ پلیئرز اور بدرمنیر کومین آف دی میچ کا ایوارڈ دیا ۔26 نومبر کو شیڈول میچ میں افغانستان کو بھارت کے خلاف واک اوور مل گیا۔

غنی انسٹی ٹیوٹ کرکٹ گراؤنڈ پرنیپال نے جنوبی افریقہ کو ایک دلچسپ مقابلے کے بعد 11 رنز سے ہرا دیا ۔ساؤتھ افریقہ نے ٹاس جیت کرپہلے نیپال کو بیٹنگ کی دعوت دی ،نیپال نے 20 اوورز میں 4 وکٹوں کے نقصان پر 198 رنز بنائے ، نریش چوہدری نے 57 بالز پر 80 رنز کی بہترین اننگز کھیلی ، ساگرلامانے 29 بالز پر 40 رنز بنائے۔جواب میں جنوبی افریقہ نے 20 اوورز میں 2 وکٹوں کے نقصان پر 187 رنز بنا سکی۔ بھولے بھڈلانے ساؤتھ افریقہ کی طرف سے شاندار سنچری سکور کرتے ہوئے 71 بالز پر 100 رنز ناٹ آؤٹ بنائے۔

لسیبا افریم نے 47بالز پر 46 رنز بنائے۔ بدھ 27 نومبر کو ورلڈ کپ کے تین میچز کھیلے جائیں گے۔ غنی انسٹی ٹیوٹ گراؤنڈ پر صبح 9 بجے ساؤتھ افریقہ اور سری لنکا مدمقابل ہوں گے۔ دوپہر ایک بجے پاکستان اور نیپال کے مابین میچ کھیلا جائے گا جبکہ باغ جناح گراؤنڈ پر صبح 10 بجے بنگلہ دیش اور افغانستان کا میچ کھیلا جائے گا۔