پاکستان کی بھارت کے زیرِ قبضہ جموں و کشمیر میں سری نگر کی جامع مسجد کی مسلسل بندش کی مذمت

اسلام آباد۔13مارچ (اے پی پی):پاکستان نے بھارت کے زیرِ قبضہ جموں و کشمیر میں سری نگر کی جامع مسجد کی مسلسل بندش کی شدید مذمت کی ہے۔ جمعہ کو ترجمان دفتر خارجہ سے جاری بیان کے مطابق پاکستان نےرمضان المبارک کے آخری جمعہ (جمعۃ الوداع) کے موقع پر سری نگر کی تاریخی جامع مسجد کی مسلسل بندش کی شدید مذمت کی ہے۔ وادی کی مقدس ترین مساجد میں سے ایک میں عبادت گزاروں کو باجماعت نماز ادا کرنے سے روکنا، بھارت کے زیرِ قبضہ جموں و کشمیر میں مذہبی آزادی اور بنیادی انسانی حقوق کی سنگین خلاف ورزی ہے۔

بیان میں کہا گیا ہے کہ ​5 اگست 2019 کے بھارتی غیر قانونی اقدامات کے بعد سے یہ مسلسل ساتواں سال ہے کہ قابض حکام نے مسجد کو سیل کرکے کشمیری مسلمانوں کو اس روحانی طور پر اہم دن پر نماز کے لئے جمع ہونے سے روکا ہے۔ مذہبی رسومات پر ایسی پابندیاں خاص طور پر رمضان کے مقدس مہینے کے دوران انتہائی تشویشناک ہیں۔​پاکستان نےعالمی برادری بشمول اقوامِ متحدہ اور انسانی حقوق کی تنظیموں سے مطالبہ کیا ہے کہ وہ ان اقدامات کا نوٹس لیں اور بھارت پر زور دیں کہ وہ بھارت کے زیرِ قبضہ جموں و کشمیر میں بنیادی انسانی حق کے طور پر مذہب کی پیروی کی آزادی کو یقینی بنائے۔