اسلام آباد۔3جولائی (اے پی پی):یو ایس ایڈ پاکستان کے مشن ڈائریکٹر ریڈ ایشلی مین نے کہا ہے کہ رواں سال ہم پاکستان کے ساتھ تعلقات کے قیام کی 75 ویں سالگرہ منا رہے ہیں، فیوچر آف ویمن اِن انرجی اسکالرکے پائلٹ پروگرام کی تقریب تعاون کے سلسلہ میں ایک سنگ میل ہے جو اس امر کی بھی عکاسی ہے کہ ہمارے درمیان شراکت کی بھرپورصلاحیت موجود ہے۔
ان خیالات کا اظہار انہوں نے امریکہ ۔ پاکستان ویمن کونسل (یو ایس پی ڈبلیو سی) کے فیوچر آف ویمن اِن انرجی اسکالرکے پائلٹ پروگرام میں شریک ہونے والی 17 پاکستانی خواتین کی گریجویشن کی تقریب سے خطاب کرتے ہوئے کیا، یہ تقریب امریکی سفارتخانہ اسلام آباد میں منعقد ہوئی امریکی ادارہ برائے بین الاقوامی ترقی کے مشن ڈائریکٹر ریڈ ایشلی مین تقریب کی صدارت کر رہے تھے۔
چار ہفتوں پر مشتمل اس پروگرام کا مقصد خواتین کو توانائی کے شعبہ میں ملازمت اختیار کرنے کی ترغیب دینا اور پاکستان میں خواتین کے کردار میں پیش رفت یقینی بنانا ہے۔ اس پروگرام میں شریک ہونے والی پاکستانی خواتین انڈر گریجویٹ طالبات سائنس کے شعبہ میں زیر تعلیم ہیں۔ گریجویشن تقریب سے خطاب کرتے ہوئے یو ایس ایڈ پاکستان کی مشن ڈائریکٹر ریڈ ایشلی مین نے کہا ہے کہ رواں سال ہم پاکستان کے ساتھ تعلقات کے قیام کی 75 ویں سالگرہ منا رہے ہیں، یہ تقریب تعاون کے سلسلہ میں ایک سنگ میل ہے جو اس امر کی بھی عکاسی کرتی ہے کہ ہمارے درمیان شراکت کی بڑی گنجائش موجود ہے۔
واضح رہے کہ مذکورہ پروگرام کا مقصد خواتین کو بااختیار بنانا، تعلیم کے مواقع فراہم کرنا اور ملازمت کے مواقع کے سلسلہ میں معاونت کرنا ہے اور یہ پروگرام دونوں ملکوں کے باہمی عزم کی گہرائی اور وسعت کے ساتھ ساتھ تعاون کو بڑہانے کے دستیاب مزید امکانات کا بھی مظہر ہے۔
یو ایس پی ڈبلیو سی،امریکی مشن پاکستان،امریکی محکمہ خارجہ،امریکی محکمہ توانائی،امریکی ادارہ برائے بین الاقوامی ترقی، ٹیکساس اے اینڈایم یونیورسٹی اور قطر میں ٹیکساس اے اینڈ ایم یونیورسٹی کے کیمپس کے تعاون سے اس کاوش کاآغاز تین جون کو قطر میں قائم امریکی یونیورسٹی ٹیکساس اے ایم کے کیمپس پر دو ہفتوں کے مطالعاتی پروگرام کے انعقاد سے ہوا۔اس دوران شرکا نے توانائی کے بنیادی ڈھانچہ، توانائی کے تحفظ ور توانائی کے شعبہ میں خواتین کے کردار کے بارے میں سیکھا اورتوانائی سے متعلق مختلف پہلووں پر آزادانہ طورپرمنصوبہ سازی کی مشق کی۔
توانائی کے شعبہ میں خواتین کی شرکت کوفروغ دینے کے خواہاں متعددپاکستانی اور بین الاقوامی کمپنیوں اور سرکاری شعبہ کے آجروں نے بھی اس پروگرام میں حصہ لیا۔ پاکستان کے لیے شفاف اورمحفوظ توانائی کے مستقبل کا ادراک کرنے کے لئے تنوع کو وسعت دینا اور خواتین کی شمولیت ضروری ہے۔ یو ایس پاکستان ویمن کونسل (یو ایس پی ڈبلیو سی) ایک پبلک پرائیویٹ پارٹنر شپ ہے جو پاکستان میں خواتین کو معاشی طور پر بااختیار بنانے کے لیے دونوں ممالک کے نجی شعبہ،سول سوسائٹی اور حکومتی رہنماؤں کے عزم کو متحرک کرتے ہوئے پاکستان میں خواتین کی معاشی شرکت کو بڑھانے کی خواہاں ہے۔
پیپسی کو،کوکا کولا،سٹی، جنرل الیکٹرک،پراکٹر اینڈ گیمبل،ایس اینڈپی گلوبل،دی ریسورس گروپ، اینگرو،دی ہاشو گروپ،دی امریکن بزنس کونسل اینڈ امریکن چیمبرآف کامرس کی یو ایس پاکستان بزنس کونسل سمیت صنفی مساوات پر کام کرنے والے معروف ادارے اس کونسل میں شامل ہیں۔
