پیر مہر علی شاہ بارانی زرعی یونیورسٹی راولپنڈی میں وزیر اعظم لیپ ٹاپ سکیم کے تحت لیپ ٹاپس تقسیم کی تقریب کا انعقاد

راولپنڈی۔29جنوری (اے پی پی):پیر مہر علی شاہ بارانی زرعی یونیورسٹی راولپنڈی میں وزیر اعظم لیپ ٹاپ اسکیم کے تحت لیپ ٹاپس تقسیم کی تقریب جمعرات کو منعقد ہوئی۔ تقریب کا اہتمام یونیورسٹی کے ڈائریکٹوریٹ آف فنانشل اسسٹنس اینڈ یونیورسٹی ایڈوانسمنٹ نے کیا۔ اس موقع پر وفاقی وزیر برائے ریلوے محمد حنیف عباسی نے بطور مہمانِ خصوصی شرکت کی۔ ان کے ہمراہ وفاقی پارلیمانی سیکرٹری برائے اطلاعات و نشریات بیرسٹر دانیال چوہدری بھی موجود تھے۔ وائس چانسلر پروفیسر ڈاکٹر قمرالزّمان نے فیکلٹی اراکین اور طلبہ کے ہمراہ مہمانوں کو خوش آمدید کہا۔ تقریب میں ڈینز، ڈائریکٹرز، فیکلٹی اور طلبہ کی بڑی تعداد شریک تھی۔

تقریب کے مہمانِ خصوصی وفاقی وزیرِ ریلوے محمد حنیف عباسی نے خطاب کرتے ہوئے کہا کہ ڈیجیٹل پاکستان ہمارا وژن ہے اور کارکردگی ہمارا عزم، حکومت نوجوانوں کو بااختیار بنانے اور ملک کو پائیدار ترقی کی راہ پر گامزن کرنے کے لئے نتیجہ خیز اور عملی اقدامات پر یقین رکھتی ہے۔ انہوں نے مزید کہا کہ حکومتِ پاکستان تعلیم کے شعبے پر خصوصی توجہ دے رہی ہے کیونکہ یہی قومی ترقی کی بنیاد ہے، طلبہ کی معاونت، ان کی تعلیمی ترقی اور معیاری تعلیم کا فروغ معاشرے کی اجتماعی ذمہ داری ہے۔ مہمانِ خصوصی کا کہنا تھا کہ وزیر اعظم لیپ ٹاپ سکیم شفافیت اور میرٹ کی علامت ہے اور ہر وہ طالب علم جو اہلیت کے معیار پر پورا اترتا ہے اسے خالصتاً میرٹ پر لیپ ٹاپ دیا جاتا ہے، یہ سکیم نہ صرف ڈیجیٹل فرق کم کرنے میں مددگار ہے بلکہ ای لرننگ، ریسرچ اور تحقیقی سرگرمیوں کے فروغ میں بھی کلیدی کردار ادا کر رہی ہے۔

وفاقی وزیر نے لیپ ٹاپ حاصل کرنے والے طلبہ کو مبارکباد دیتے ہوئے کہا کہ وہ محنت، توجہ اور لگن کے ساتھ اپنی تعلیم جاری رکھیں اور ملک و قوم کا نام روشن کریں۔ انہوں نے نوجوانوں کو نصیحت کی کہ وہ اساتذہ کا احترام کریں کیونکہ ان کی رہنمائی اور دعائیں کامیاب زندگی کی ضمانت ہیں۔اس موقع پر وائس چانسلر پروفیسر ڈاکٹر قمرالزمان نے مہمانِ خصوصی کا خیر مقدم کرتے ہوئے تعلیمی میدان میں ان کی خدمات اور تعاون پر دلی شکریہ ادا کیا۔ انہوں نے لیپ ٹاپ حاصل کرنے والے تمام طلبہ کو مبارکباد پیش کی اور کہا کہ وزیر اعظم لیپ ٹاپ سکیم ایک دور اندیش اور مفید قدم ہے جو نہ صرف طلبہ کی معاونت کرتی ہے بلکہ ڈیجیٹل خواندگی اور معیاری تعلیم کے فروغ میں بھی اہم کردار ادا کر رہی ہے۔ ان کا کہنا تھا کہ موجودہ ڈیجیٹل دور میں لیپ ٹاپ تعلیم، تحقیق اور سیکھنے کا مؤثر ذریعہ ہے۔

وائس چانسلر پروفیسر ڈاکٹر قمرالزمان نے مزید کہا کہ محمد حنیف عباسی نہ صرف یونیورسٹی کے مخلص دوست ہیں بلکہ وہ راولپنڈی اور مضافاتی علاقوں میں اعلیٰ تعلیم کے فروغ کے لئے ہمیشہ سرگرم رہتے ہیں۔ انہوں نے یونیورسٹی کی کامیابیوں پر روشنی ڈالتے ہوئے بتایا کہ وزیر اعظم لیپ ٹاپ سکیم کے آغاز سے اب تک 15 ہزار سے زائد طلبہ اس پروگرام سے مستفید ہو چکے ہیں جبکہ آج مزید 450 طلبہ کو لیپ ٹاپ دیئے جا رہے ہیں۔

انہوں نے کہا کہ یہ لیپ ٹاپ طلبہ کی تعلیمی اور تحقیقی صلاحیتوں کو بڑھانے میں مددگار ثابت ہوئے ہیں جس سے وہ قومی ترقی میں مؤثر کردار ادا کر رہے ہیں۔تقریب کے اختتام پر طلبہ میں لیپ ٹاپ تقسیم کئے گئے۔ طلبہ نے وزیر اعظم ، حکومت اور یونیورسٹی انتظامیہ کا شکریہ ادا کرتے ہوئے کہا کہ یہ اقدام تعلیم اور ڈیجیٹل ترقی کے فروغ کی جانب ایک اہم قدم ہے۔