اسلام آباد ۔ 28 اکتوبر (اے پی پی) چیئرمین ایف بی آر سید محمد شبر زیدی نے تمام بینکوں کو مراسلہ ارسال کیا ہے جس میں کہا گیا ہے کہ بینکوں کی طرف سے مختلف اکاﺅنٹ ہولڈرز کی طرف سے خریدے گئے بانڈز کی تفصیلات ابھی تک ایف بی آر کو فراہم نہیں کی گئی ہیں لہذا انہیں فوری فراہم کیا جائے۔ ایف بی آر کے مطابق مراسلہ میں تمام بینکوں کے سربراہان کو چیئرمین ایف بی آر کی طرف سے یاد دہانی کرائی گئی ہے کہ بانڈ ہولڈرز کی تفصیلات فنانشنل ایکشن ٹاسک فورس کی شرائط کے تحت بھی مطلوب ہیں۔ مراسلہ میں کہا گیا کہ ایسے اکاﺅنٹ ہولڈرز کی رقوم انکم ٹیکس گوشواروں میں بھی ظاہر نہیں ہو رہی ہیں، بانڈ واشنگ کے تحت ٹیکس ادائیگی کو چھپایا جا رہا ہے اور ود ہولڈنگ ٹیکس ادا نہیں کیا جا رہا۔ مراسلہ میں مزید کہا گیا ہے کہ لین دین کے نظام کو ریگولیٹ کرنے کے تحت تمام دولت اور ود ہولڈنگ کو قانون کے تحت ظاہر کرنا ضروری ہے۔ چیئرمین ایف بی آر نے ایک مرتبہ دوبارہ تمام بینکوں سے درخواست کی ہے کہ وہ اس سلسلے میں ضروری معلومات فوری فراہم کریں۔
