لاہور۔3اپریل (اے پی پی):چیئرمین پاکستان کرکٹ بورڈ محسن نقوی نے ایشیئن کرکٹ کونسل کے نئے صدر کے طور پر چارج سنبھال لیا ہے، ان کی تقرری ایشیئن کرکٹ کے لیے ایک نئے دور کا آغاز ہے۔ایشیئن کرکٹ کونسل کی جانب سے جاری آفیشل بیان میں محسن نقوی نے کہا کہ ایشیئن کرکٹ کونسل کے صدر کے طور پر کام کرنا میرے لیے بڑا اعزاز ہے، ایشیاء کرکٹ کا دل اور میں سب رکن بورڈز کے ساتھ مل کر کرکٹ کو مزید آگے لے جانے کی کوشش کروں گا۔
انہوں نے کہاکہ میں اپنے پیشرو صدر کا شکریہ ادا کرتا ہوں،ہم سب مل کر نئے مواقع پیدا کریں گے اور ایشیائی کرکٹ کو نئی بلندیوں تک پہنچائیں گے۔ محسن نقوی نے سری لنکا کرکٹ کے صدر شامی سلوا کی جگہ لی ہے۔ محسن نقوی کی قیادت میں ایشیئن کرکٹ کونسل کرکٹ کے ترقیاتی پروگرامز، نوجوانوں کو کرکٹ میں شامل کرنے اور ایشیائی کرکٹ کو دنیا بھر میں اہم بنانے کے لیے کام کرے گی۔
Short Link: https://urdu.app.com.pk/urdu/?p=578218
