چیئرمین ہائر ایجوکیشن کمیشن ڈاکٹر نیاز احمد اختر کا ڈی ایچ اے صفا یونیورسٹی کا دورہ

اسلام آباد۔23جولائی (اے پی پی):چیئرمین ہائر ایجوکیشن کمیشن (ایچ ای سی) پروفیسر ڈاکٹر نیاز احمد اختر نے ڈی ایچ اے صفا یونیورسٹی کا دورہ کیا جہاں انہوں نے یونیورسٹی کے اساتذہ اور عملے سے خطاب کرتے ہوئے اعلیٰ تعلیم کے معیار، تحقیق، اختراع، معیار تعلیم کی یقین دہانی اور تدریس و تعلم میں مسلسل بہتری کی ثقافت کو فروغ دینے کی ضرورت پر زور دیا۔

چیئرمین ایچ ای سی نے اپنے خطاب میں کہا کہ پاکستان کی جامعات کو قومی اور عالمی تقاضوں سے ہم آہنگ بنانے کے لیے معیاری تعلیم، مؤثر تحقیق اور جدت پر خصوصی توجہ دینا وقت کی اہم ضرورت ہے۔

انہوں نے کہا کہ اساتذہ اور جامعات کا کردار مستقبل کے تقاضوں سے ہم آہنگ افرادی قوت کی تیاری میں کلیدی حیثیت رکھتا ہے۔ انہوں نے ڈی ایچ اے صفا یونیورسٹی کی جانب سے اعلیٰ تعلیم کے فروغ، تعلیمی معیار کی بہتری، تحقیق اور اختراع کے شعبوں میں کیے جانے والے اقدامات کو سراہتے ہوئے کہا کہ جامعات کے درمیان تعاون اور علم کے تبادلے سے تعلیمی نظام مزید مضبوط ہوگا۔

پروفیسر ڈاکٹر نیاز احمد اختر نے اس موقع پر اس عزم کا اعادہ کیا کہ ہائر ایجوکیشن کمیشن ملک بھر کی جامعات کو معیاری تعلیم کے فروغ، تحقیق و اختراع کے استحکام، معیار تعلیم کی بہتری اور ایسے گریجویٹس کی تیاری کے لیے ہر ممکن تعاون فراہم کرتا رہے گا جو مستقبل میں قومی اور عالمی چیلنجز سے موثر انداز میں نمٹنے کی صلاحیت رکھتے ہوں۔