اسلام آباد۔26مارچ (اے پی پی):وفاقی وزیر خزانہ ومحصولات سینیٹرمحمداورنگزیب نے سی پیک فیز ٹو میں ملک میں تعمیر شدہ بنیادی ڈھانچہ سے مالی منفعت کو فروغ اور چینی صنعتوں کو اس انفراسٹرکچر سے مستفید ہونے کے لیے پاکستان منقلی پر کام کرنے کی ضرورت کو اجاگر کرتے ہوئے کہاہے کہ چین کا برآمدی شعبہ اور کمپنیاں پاکستان میں موجود انفراسٹرکچر بالخصوص سستی افرادی قوت کا فائدہ اٹھا سکتی ہیں۔ انہوں نے یہ بات بواؤ فورم برائے ایشیا سالانہ کانفرنس 2025 میں شرکت کے دوران چینی میڈیاسے گفتگو میں کہی ۔
وزیر خزانہ نے چین کی جانب سے اپنی معیشت اور منڈیوں کو کھولنے کے اقدام کو سراہا اورکہاکہ چین کی آدھی برآمدات کے غیر ملکی کمپنیوں اور فرموں کے ہاتھوں وقوع پذیر ہونے کے اعداد و شمار لائق تحسین ہیں، ہم چین کی طرح پاکستان کو غیر ملکی بالخصوص چینی کمپنیوں کی برآمدی تنصیبات و سہولیات کی منتقلی کا مرکز بنانے کے خواہش مندہیں۔ وزیر خزانہ نے سی پیک منصوبے کے تحت پاکستان میں مواصلات بنیادی ڈھانچہ، سڑکوں اور بندگاہوں کی تعمیر کو سراہا اورکہاکہ سی پیک فیز ٹو میں ملک میں تعمیر شدہ انفراسٹرکچر سے مالی منفعت کو فروغ اور چینی صنعتوں کو اس انفراسٹرکچر سے مستفید ہونے کے لیے پاکستان منقلی پر کام کرنے کی ضرورت ہے۔
انہوں نے علاقائی تجارت اور خطے کے ممالک کے ساتھ سڑک اور ریل روابط کی تعمیر اور استحکام کے لیے پاکستان کے عزم کا اعادکرتے ہوئے کہاکہ چین کا برآمدی شعبہ اور کمپنیاں پاکستان میں موجود انفراسٹرکچر بالخصوص سستی افرادی قوت کا فائدہ اٹھا سکتی ہیں ۔
انہوں نے چین کی دنیا کی سب سے بڑی اور گہری کیپٹل مارکیٹ میں پاکستان کی رسائی کے لیے پانڈا بانڈ کے اجرا کا عزم ظاہر کیا ،انہوں نے کہا کہ پاکستان نے ماضی میں امریکی ڈالر اور یورو میں کئی بانڈز کا اجرا کیا ہے، اب وقت آ گیا ہے کہ چینی کیپٹل مارکیٹ سے استفادہ کیا جائے۔وزیر خزانہ محمداورنگزیب نے پاکستان کی جانب سے اس سال یوآن میں جاری ہونے والے ”پانڈا بانڈز” کے اجرا کا قوی امکان ظاہر کرتے ہوئے کہاکہ پانڈا بانڈ کے اجرا سے پاکستان کی کیپیٹل مارکیٹوں کو چین کے ساتھ جوڑنے اور پاکستان کی ڈیجیٹل تبدیلی میں چین کے اہم کردار کی عکاسی ہوگی۔
وزیر خزانہ نے پاکستان اور چین کو آئرن برادرز اور اسٹریٹجک پارٹنرز قرار دیتے ہوئے چین کی مستقل حمایت پر شکریہ ادا کیا ۔ انہوں نے دورہ کے دوران چینی بینکوں کے دورہ اور ان کی ڈیجیٹل تبدیلی کا مطالعہ کیا۔ انہوں نے اس بات پر زور دیا کہ پاکستان چین کے تجربات سے سیکھ کربالخصوص ڈیجیٹل حل کے ذریعے مالی شمولیت میں بہتری لا سکتا ہے۔ وزیر خزانہ نے مالیاتی ٹیکنالوجی کے علاوہ زراعت، ڈرون ٹیکنالوجی اور دیگر اہم شعبوں میں دو طرفہ تعاون پر بھی روشنی ڈالی۔
Short Link: https://urdu.app.com.pk/urdu/?p=576510
