چین کا کمبوڈیا اورتھائی لینڈ کے درمیان سرحدی جھڑپوں پر اظہار تشویش

بیجنگ۔24جولائی (اے پی پی):چین نے کمبوڈیا اور تھائی لینڈ کے درمیان طویل عرصے سے جاری سرحدی تنازعے پر جمعرات کو شروع ہونے والی جھڑپوں پر گہری تشویش کا اظہار کیا ہے۔اے ایف پی کے مطابق چینی وزارت خارجہ کے ترجمان گوو جیاکن نے کہا کہ ہمیں دونوں ممالک کے درمیان پیدا ہونے والی موجودہ صورتحال پر گہری تشویش ہے، امید کرتے ہیں کہ دونوں فریق مذاکرات اور مشاورت کے ذریعے مسائل کو مناسب طریقے سے حل کریں گے۔انہوں نے کہا کہ اختلافات کو مناسب انداز میں حل کرنا اور اچھے ہمسائیگی تعلقات دونوں ممالک کے بنیادی اور طویل مدتی مفاد میں ہے۔

واضح رہے کہ دونوں ممالک کے درمیان حالیہ جھڑپیں ایمرالڈ ٹرائی اینگل نامی علاقے پر شروع ہوئی ہیں جہاں کمبوڈیا، تھائی لینڈ اور لاؤس کی سرحدیں ملتی ہیں۔یہ تنازعہ کئی دہائیوں سے جاری ہے جو 15 سال قبل خونریز فوجی جھڑپوں کی صورت اختیار کر گیا تھا اور اب مئی میں اس وقت بھڑک اٹھا جب ایک کمبوڈین فوجی فائرنگ کے تبادلے میں مارا گیا۔جمعرات کو جھڑپیں اس وقت شدید ہو گئیں

جب کمبوڈیا نے تھائی لینڈ کی جانب راکٹ داغے جبکہ تھائی فوج نے ایف16 طیارے فضائی حملوں کے لیے روانہ کیے۔ جھڑپوں میں کم از کم ایک شہری ہلاک اور تین زخمی ہو چکے ہیں۔چینی وزارت خارجہ کے ترجمان نے کہا کہ چین ان جھڑپوں میں منصفانہ اور غیر جانبدارانہ مؤقف اختیار کرے گا۔انہوں نے کہا کہ چین اپنے انداز میں امن و مکالمے کو فروغ دینے کی بھرپور کوشش کرتا رہا ہے اور کرتا رہے گا۔