چین کی ژو لِن آسٹریلین اوپن کوالیفائنگ کے دوسرے راؤنڈ میں پہنچ گئیں

میلبورن۔12جنوری (اے پی پی):چین کی ٹینس کھلاڑی ژو لِن آسٹریلین اوپن کے کوالیفائنگ راؤنڈ میں شاندار کارکردگی کا مظاہرہ کرتے ہوئے برازیل کی لورا پیگوسی کو شکست دے کر دوسرے راؤنڈ میں پہنچ گئیں۔شنہوا کے مطابق میلبورن پارک میں کھیلے گئے کوالیفائنگ میچ میں چین کی ژو لِن نے ابتدائی مشکلات کے باوجود زبردست کم بیک کیا اور عالمی نمبر 200 پیگوسی کو سٹریٹ سیٹس میں 4-6 اور 4-6 سے شکست دی۔

یہ مقابلہ ایک گھنٹہ 35 منٹ تک جاری رہا۔میچ کے آغاز میں چین کی ژو لِن پہلے پانچ گیمز میں سے 4 ہار گئیں، تاہم اس کے بعد مسلسل پانچ گیمز جیت کر پہلا سیٹ اپنے نام کیا۔ دوسرے سیٹ میں بھی وہ 2-4 سے پیچھے تھیں، لیکن ایک بار پھر شاندار واپسی کرتے ہوئے لگاتار 4 گیمز جیتے اور طاقتور بیک ہینڈ کے ذریعے چوتھے میچ پوائنٹ پر کامیابی حاصل کی۔آسٹریلین اوپن کے مین ڈراز میں جگہ بنانے کے لیے کھلاڑیوں کو کوالیفائنگ راؤنڈز جیتنا ضروری ہوتے ہیں۔

چین کی ژو لِن اب دوسرے راؤنڈ میں اینڈورا کی وکٹوریہ خیمنیز کاسینتسیوا کا سامنا کریں گی۔واضح رہے کہ آسٹریلین اوپن ٹینس کے چار بڑے گرینڈ سلام ٹورنامنٹس میں شامل ہے، جو 18جنوری سے میلبورن پارک میں شروع ہو رہا ہے۔

رواں سال ٹورنامنٹ کی مجموعی انعامی رقم 111.5 ملین آسٹریلین ڈالر رکھی گئی ہے، جو گزشتہ سال کے مقابلے میں 16 فیصد زیادہ ہے۔چین کی ژو لِن کی یہ فتح چینی ٹینس کے لیے ایک مثبت اشارہ سمجھی جا رہی ہے، اور شائقین کو امید ہے کہ وہ کوالیفائنگ کے مزید مراحل میں بھی عمدہ کارکردگی دکھائیں گی۔