ڈیون نیش نیوزی لینڈ کرکٹ بورڈ کے لیے منتخب

ویلنگٹن۔20نومبر (اے پی پی):نیوزی لینڈ کرکٹ(این زیڈ سی ) نے سابق آل راؤنڈر اور قومی سلیکٹر ڈیون نیش کو اپنے بورڈ میں منتخب کر لیا ہے

53 سالہ ڈیون نیش مارٹن سنیڈن کی جگہ ذمہ داریاں نبھائیں گے۔ مارٹن سنیڈن بطور چیف ایگزیکٹو، بورڈ ممبر، بورڈ کے چیئرمین اور آئی سی سی کے ڈائریکٹر کے طور پر کھیل میں طویل خدمات انجام دینے کے بعد روٹیشن کے ذریعے نیوزی لینڈ کرکٹ بورڈ سے مستعفی ہوگئے ۔

نیوزی لینڈ کرکٹ کی چیئر مین ڈیانا پوکیپٹولنڈن نے کہا ہے کہ ہمیں خوشی ہے کہ ڈیون نیش کی نیوزی لینڈ کرکٹ بورڈ میں ایسے وقت پر شمولیت ہورہی ہے جب اس کی ضرورت ہے۔

ڈیون نیش بحیثیت کھلاڑی اور اچھا منتظمین کرکٹ کا وسیع تجربہ رکھتا ہے ۔ ہمیں امید ہے کہ ڈیون نیش مارٹن سنیڈن کی جگہ خوب ذمہ داریاں نبھائیں گے ۔ ڈیانا پوکیپٹولنڈن نے مزید کہا ہے کہ ڈیون نیش کی نہ صرف کرکٹ کھیلنے میں بلکہ کھیل کے انتظامی امور میں بھی گہری دلچسپی ہے۔ڈیون نیش کو 1992 سے 2002 تک 32 ٹیسٹ اور 81 ون ڈے انٹرنیشنل میچز میں نیوزی لینڈ کی نمائندگی کا اعزاز حاصل ہے۔

ڈیون نیش 2000 کے آئی سی سی ناک آؤٹ میں نیوزی لینڈ کے ٹائٹل جیتنے والے سکواڈ کا حصہ تھے۔ انہوں نے لارڈز میں کھیلے گئے اپنے پانچویں ٹیسٹ میچ میں نصف سنچری بنانے کے علاوہ 10وکٹیں بھی حاصل کیں۔اس کے علاوہ ڈیون نیش نے 1999 کے اوائل میں باقاعدہ کپتان سٹیفن فلیمنگ کے زخمی ہونے کے بعد 7 ون ڈے اور تین ٹیسٹ میچز میں کیوی ٹیم کی قیادت بھی کی ۔

کرکٹ سے ریٹائرمنٹ کے بعدانہوں نے 2005 میں مردوں کی ٹیم کے سلیکٹر کے طور پر فرئض انجام دیئے ۔