ڈی آئی جی محمد جواد طارق کا امن و امان کی صورتحال اور سکیورٹی انتظامات کا جائزہ لینے کے لئے فیض آباد کا دورہ

اسلام آباد۔12اکتوبر (اے پی پی):ڈپٹی انسپکٹر جنرل (ڈی آئی جی) محمد جواد طارق نے امن و امان کی صورتحال اور سکیورٹی انتظامات کا جائزہ لینے کے لئے فیض آباد کا دورہ کیا اور سکیورٹی اہلکاروں کو ہدایت کی کہ وہ مکمل طور پر چوکس اور ہوشیار رہیں، شہریوں کی حفاظت کو یقینی بنانے میں کوئی غفلت برداشت نہیں کی جائے گی۔

ایک عہدیدار نے اتوار کو اے پی پی کو بتایا کہ ڈی آئی جی جواد طارق نے ڈیوٹی پر تعینات افسران اور اہلکاروں سے ملاقات کی۔ڈی آئی جی نے کہا کہ ہر افسر کو چوکس رہنا ہوگا،عوام کے تحفظ پر کوئی سمجھوتہ نہیں کیا جائے گا۔انہوں نے کہا کہ شہر میں امن کو ہر قیمت پر برقرار رکھنا ہوگا۔انہوں نے خبردار کیا کہ شرارت یا قانون شکنی کی کسی بھی کوشش سے سختی سے نمٹا جائے گا اور کسی فرد کو قانون کو اپنے ہاتھ میں لینے کی اجازت نہیں دی جائے گی۔

ڈی آئی جی محمد جواد طارق نے شہریوں سے بھی اپیل کی کہ وہ کسی غیر قانونی سرگرمی سے گریز کریں اور امن و امان برقرار رکھنے میں پولیس کے ساتھ مکمل تعاون کریں۔انہوں نے کہا کہ شہریوں کی جان و مال کی حفاظت ہمارا مشن ہے، جبکہ عوام کا اعتماد ہمارا سب سے قیمتی اثاثہ ہے۔