کامسٹیک اور ہائر ایجوکیشن کمیشن کے درمیان سائنس، ٹیکنالوجی اور اعلیٰ تعلیم کے فروغ کے لئے تعاون بڑھانے پر اتفاق

اسلام آباد۔12مارچ (اے پی پی):کامسٹیک اور ہائر ایجوکیشن کمیشن پاکستان کے درمیان سائنس، ٹیکنالوجی اور اعلیٰ تعلیم کے شعبوں میں باہمی تعاون کو مزید فروغ دینے پر اتفاق کیا گیا ہے۔یہ اتفاق رائے ایچ ای سی سیکرٹریٹ اسلام آباد میں کامسٹیک کے کوآرڈینیٹر جنرل پروفیسر ڈاکٹر محمد اقبال چوہدری اور چیئرمین ہائر ایجوکیشن کمیشن پروفیسر ڈاکٹر نیاز احمد اختر کے درمیان ہونے والی ملاقات کے دوران طے پایا۔ملاقات میں اتفاق کیا گیا کہ اسلامی تعاون تنظیم (او آئی سی) کے رکن ممالک میں تحقیق اور تعلیمی تعاون کو فروغ دینے کے لئے متعدد مشترکہ پروگرام شروع کئے جائیں گے۔

اس سلسلے میں مسلم اقلیتی برادریوں اور تنازعات سے متاثرہ علاقوں سے تعلق رکھنے والے محققین کے لئے سالانہ 200 فیلوشپس فراہم کی جائیں گی جن کے تحت انہیں پاکستان کی نمایاں جامعات میں تحقیق کے مواقع میسر آئیں گے۔ملاقات میں طے پایا کہ کامسٹیک کے پروگرام برائے ممتاز سکالرز پروگرام کے تحت سائنس، ٹیکنالوجی، انجینئرنگ اور ریاضی (سٹیم) کے شعبوں میں پاکستان کے ممتاز اساتذہ اور ماہرین کے سالانہ 200 دوروں کی سرپرستی کی جائے گی تاکہ وہ او آئی سی رکن ممالک کے تعلیمی و تحقیقی اداروں کے ساتھ علمی روابط کو مضبوط بنا سکیں۔دونوں اداروں نے او آئی سی کے رکن ممالک کی جامعات کی عالمی درجہ بندی بہتر بنانے کے لئے ایک خصوصی استعداد کار پروگرام شروع کرنے پر بھی اتفاق کیا۔

اس کے علاوہ ایکریڈیٹیشن کونسلز کے لئے بھی ایک خصوصی پروگرام متعارف کرایا جائے گا تاکہ انہیں بین الاقوامی معیار اور بہترین طریقہ کار سے ہم آہنگ کیا جا سکے۔ملاقات کے دوران پاکستانی جامعات کی عالمی سطح پر نمایاں موجودگی کو فروغ دینے پر بھی تبادلہ خیال کیا گیا، اس مقصد کے لئے پاکستانی جامعات کے انٹرنیشنل آفسز کو مضبوط بنانے کے لئے ایک خصوصی استعداد کار پروگرام شروع کیا جائے گا۔ان اقدامات پر عملدرآمد کے لئے کامسٹیک اور ہائر ایجوکیشن کمیشن کے درمیان باضابطہ مفاہمتی یادداشت (ایم او یو) پر دستخط کئے جائیں گے۔اس موقع پر کامسٹیک کے فوکل برائے کنسورشیم آف ایکسی لینس و کوآرڈینیٹر آئوٹ ریچ محمد مرتضیٰ نور بھی موجود تھے۔