کامن ویلتھ یوتھ پروگرام کا 2026 کے کامن ویلتھ یوتھ ایوارڈز کے لیے باضابطہ طور پر نامزدگیوں کا آغاز

اسلام آباد۔8اکتوبر (اے پی پی):کامن ویلتھ یوتھ پروگرام نے 2026 کے کامن ویلتھ یوتھ ایوارڈز کے لیے باضابطہ طور پر نامزدگیوں کا آغاز کر دیا ، ایک نئے اور باوقار اعزاز کے آغاز کے ساتھ یہ ایوارڈ نوجوان مواصلاتی پیشہ ور افراد کے لیے وقف ہے۔وزیر اعظم یوتھ پروگرام کے اعلیٰ عہدیدار کے مطابق کمیونٹی ڈویلپمنٹ اینڈ پیس کو آگے بڑھانے میں نمایاں کمیونیکیشن سکلز کے لیے پاٹسی رابرٹسن ایوارڈ غیر معمولی صلاحیتوں کے حامل نوجوان صحافیوں، مصنفین، براڈکاسٹرز اور ڈیجیٹل میڈیا تخلیق کاروں کے کام کو نمایاں کرے گا جن کا کام دولت مشترکہ میں جامع معاشروں، میڈیا کی آزادی اور جمہوری اقدار کو فروغ دینا ہے۔

یہ نیا ایوارڈ دولت مشترکہ سیکرٹریٹ میں مواصلات کے سابق ڈائریکٹر اور کامن ویلتھ ایسوسی ایشن کے بانی چیئر آنجہانی پاٹسی رابرٹسن کی میراث کو خراج تحسین پیش کرتا ہے۔ رابرٹسن کو میڈیا کی آزادی، صحافت میں صنفی مساوات اور مواصلات کی تبدیلی کی طاقت کے لیے ان کی بے خوف وکالت کے لیے بڑے پیمانے پر پہچانا جاتا تھا۔ کامن ویلتھ ایسوسی ایشن کے ساتھ شراکت میں متعارف کرائے گئے اس ایوارڈ کا مقصد نوجوانوں کو مباحثہ کی جانب راغب کرنا ہے جو کہانی نویسی ، تحقیقاتی صحافت اور ڈیجیٹل پلیٹ فارمز کو امن کے فروغ ، کمیونٹی کی آواز بڑھانے اور دولت مشترکہ کی اقدار کو برقرار رکھنے کے لیے استعمال کر رہے ہیں۔

ایوارڈ جیتنے والے کو ٹرافی اور سرٹیفکیٹ کے ساتھ 1,000 یورونقد انعام ملے گا اور مارچ 2026 میں کامن ویلتھ ویک کے دوران اسے باضابطہ طور پر تسلیم کیا جائے گا۔ اہل امیدواروں کا مواصلاتی کام بشمول ایڈیٹرز، رپورٹرز، فوٹو جرنلسٹ، بلاگرز، پوڈ کاسٹرز، مبصرین، براڈکاسٹرز، سوشل میڈیا ایکٹوسٹس اور سٹریمرز میں شامل ہونا ضروری ہے۔درخواست دہندگان کو اپنے شائع شدہ یا نشریاتی کام کے نمونے، پیشہ ورانہ حوالہ جات اور اس بات کی واضح وضاحت پیش کرنی چاہیے کہ ان کا کام پائیدار ترقیاتی ہدف (SDG) 16 میں کس طرح تعاون کرتا ہے جو امن، انصاف اور مضبوط اداروں کو فروغ دینے پر مرکوز ہے۔

فیصلہ سازی میں نامزد افراد کے کام کے اثرات، جدت اور تخلیقی صلاحیتوں کی سطح، کامیابیوں کے معیارو اعتبار، فراہم کردہ شواہد اور ان کے اقدامات کی پائیداری پر غور کیاجائےگا۔پاٹسی رابرٹسن ایوارڈ وسیع تر کامن ویلتھ یوتھ ایوارڈز برائے ایکسی لینس ان ڈیولپمنٹ ورک کا حصہ ہے جو افریقا، ایشیا، کیریبین، یورپ اور بحرالکاہل میں سالانہ 20 علاقائی فائنلسٹوں کو تسلیم کرتا ہے، ہر علاقائی فائنلسٹ کو 1,000 یورو گرانٹ، ٹرافی اور ایک سرٹیفکیٹ ملے گا۔ ان فائنلسٹس میں سے پانچ علاقائی فاتحوں کا انتخاب کیا جائے گا جن میں سے ہر ایک کو اضافی 2,000 یورو ملیں گے اور ایک شاندار فرد کو پین کامن ویلتھ ونر اور کامن ویلتھ ینگ پرسن آف دی ایئر کا نام دیا جائے گا جس کو کل 5,000 یوروملیں گے۔کامن ویلتھ یوتھ ایوارڈز کا مقصد پائیدار ترقیاتی اہداف (SDGs) پر نوجوانوں کے اثرات کو منانا، نوجوانوں کی زیرقیادت ترقی کی حوصلہ افزائی کرنا،

رکن ممالک میں نوجوانوں کی تخلیقی صلاحیتوں و قیادت کو ظاہر کرنا اور جمہوری، منصفانہ اور جامع معاشروں کی تشکیل میں نوجوانوں کے کردار کو فروغ دینا ہے۔پاٹسی رابرٹسن ایوارڈ سمیت تمام ایوارڈ کیٹیگریز کے لیے نامزدگیاں 17 اکتوبر 2025 تک جمع کرائی جاسکتی ہیں۔

مزید جاننے کے لیے یہ ملاحظہ کریں:

https://thecommonwealth.org/news/commonwealth-youth-awards-introduces-new-category-honouring-young-champions-media-freedom
*درخواستیں آفیشل کامن ویلتھ یوتھ ایوارڈز پلیٹ فارم کے ذریعے جمع کرائی جا سکتی ہیں:
https://commonwealth-youthexcellence.awardsplatform.com/