کراچی ۔5جون (اے پی پی):پاک بحریہ کے زیر انتظام عالمی یوم ماحولیات منایا گیا، جس کا مقصد ماحول کی اہمیت اور تحفظ خصوصا ًبحری ماحول کے حوالے سے آگہی پیدا کرنا تھا۔جاری اعلامیہ کے مطابق عالمی یوم ماحولیات ہر سال اقوام متحدہ کے زیر انتظام صحت مند اور سرسبز ماحول کی اہمیت کے بارے میں آگہی اجاگر کرنے کے لئے منایا جاتا ہے۔ اس کا مقصد ایسے ماحولیاتی اقدامات کو اجاگر کرنا ہے جن کے ذریعے موجودہ اور بالخصوص آئندہ نسلوں کی زندگی کے معیار کو بہتر بنایا جاسکے۔
اس سال ماحول کے عالمی دن کا موضوع ” صرف ایک زمین” ہے اور اس زمین کی خاطر فطرت سے ہم آہنگی پیدا کرنے کے لیے بڑے پیمانے پر پالیسیوں میں تبدیلی اور سرسبز و شاداب اور پائیدار طرز زندگی کے فروغ کے لیے جدوجہد کی ضرورت ہے۔
پاک بحریہ ماحول کا عالمی دن تسلسل کے ساتھ مناتی ہے، اس عزم کے اعادہ اور ماحول کی اہمیت اجاگر کرنے کے لیے متعدد لیکچرز منعقد کیے گئے۔ مزید برآں پاک بحریہ نے ماحول کے تحفط کے لیے متعدد اقدامات کیے جن میں مینگرووز اور شجرکاری کی مہمات ، پولیتھین بیگز کے استعمال پر پابندی، ہاربر میں سالڈ ویسٹ کو جمع کرنا، نکاسی آب کے لیے ریڈ بیڈ اور ریورس اوسماسز پلانٹس کا قیام اور تھری بن سسٹم کا منصوبہ ، جس کے تحت زیر زمین تلف کیے جانے والے فضلاء، دوبارہ استعمال کے قابل اشیاء اور کھاد کے طور پر استعمال ہونے والے نامیاتی مواد کو الگ کیا جاسکے ، شامل ہیں۔
پاک بحریہ محفوظ بحری ماحول اور صاف ستھرے سمندروں کے لئے ہمیشہ سے کوشاں ہے۔ امیر البحر ایڈمرل محمد امجد خان نیازی نے عالمی یومِ ماحولیات کے موقع پر اپنے پیغام میں پاک بحریہ کے اس عزم کا اعادہ کیا ہے کہ ماحول کی بہتری کے لئے تمام اقدامات بروئے کار لائے جائیں گے۔ انہوں نے سب پر زور دیا کہ وہ یکجا ہو کر ہمارے مشترکہ اثاثہ، ماحولیات کے تحفظ کے لیے بہترین طریقوں اور اصولوں کو اپنائیں۔