کرتار پور میں بابا گورو نانک کے جنم دن پر انٹرنیشنل کبڈی فیسٹیول کا انعقاد ،یاتریوں سمیت مقامی لوگوں کی بڑی تعداد نے کبڈی میچ دیکھا

لاہور/نارووال۔19نومبر (اے پی پی):پاکستان سکھ گردوارہ پربندھک کمیٹی کرتار پور اور پاکستان کبڈی فیڈریشن کے اشتراک سے بابا گورو نانک انٹرنیشنل کبڈی فیسٹیول کا انعقاد،یاتریوں سمیت مقامی لوگوں کی بڑی تعداد نے کبڈی میچ دیکھا،بہترین کھیل پر کھلاڑیوں کو بھر پو ر داد دی ۔ترجمان کے مطابق انٹرنیشنل کبڈی فیسٹیول میں پردھان پاکستان سکھ گردوارہ پربندھک کمیٹی سردار رمیش سنگھ اروڑہ، سی ای او کرتارپور ابو بکر آفتاب قریشی نے بطور مہمان خصوصی شرکت کی ۔

ایڈیشنل سیکرٹری شرائنز سیف اللہ کھوکھر ،چیئرمین پاکستان کبڈی فیڈریشن چوہدری شافع حسین ،وزیر قانون پنجاب صہیب برتھ،وزیر ٹرانسپورٹ پنجاب بلال اکبر اورڈپٹی کمشنر نارووال سمیت بابا گرو نانک دیو جی کے جنم دن کے موقع پر بھارت سے پاکستان آ ئے سکھ یاتریوں نے بھی شرکت کی۔ ترجمان کے مطابق کبڈی میچ بندیشہ رائل بیلجیم کبڈی کلب اور رائل کنگ کبڈی کلب کے درمیان مقابلہ ہوا۔ مقابلہ رائل بیلجیم کبڈی کلب نے جیت لیا۔

اس موقع پر پردھان پاکستان سے گردوارہ پر بندے کمیٹی سردار رمیش سنگھ نے میڈیا سے گفتگو کرتے ہوئے بابا گرو نانک کبڈی فیسٹیول کے انعقاد پر چیئرمین متروکہ وقف املاک بورڈ سید عطا الرحمن،اور پی ایم یو کرتار پور کا شکریہ ادا کرتے ہوئے کہا کہ آج ہم نے بنیاد رکھ دی ہے ہر سال یہاں کبڈی میچ ہوگا۔ کھیلوں کے انعقاد سے دونوں ملکوں کے تعلقات ٹھیک ہو سکتے ہیں۔

انہوں نے ضلعی انتظامیہ اور سکیورٹی اداروں کا بھی شکریہ ادا کیا۔کرتار پور مینجمنٹ یونٹ کے چیف ایگزیکٹو افیسر ابوبکر آفتاب قریشی نے کہا کہ کرتار پور انتظامیہ کھیلوں کے انعقاد کے لیے اپنی تمام صلاحیتیں بروئے کار لائے گی اور کھیل کے ذریعے محبت اور امن کا پیغام دنیا بھر میں پہنچائیں گے۔کبڈی فیسٹیول میں شریک سکھ یاتریوں نے اظہار خیال کرتے ہوئے کہا کہ کبڈی پنجا بی کلچر کی پہچان ہے ،سکھ یاتری گورو نانک کبڈی فیسٹیول کے انعقاد پر حکومت پاکستان مبارک باد کی مستحق ہے ۔