کمبوڈیا اور تھائی لینڈ کے ساتھ قریبی روابط برقرار رکھیں گے، ترجمان چینی وزارت خارجہ

بیجنگ۔28جولائی (اے پی پی):چین نے کہا ہے کہ وہ اس وقت باہم برسرپیکار کمبوڈیا اور تھائی لینڈ کے ساتھ قریبی روابط برقرار رکھے گا ۔چائنا گلوبل ٹیلی ویژن نیٹ ورک ( سی جی ٹی این) کے مطابق چینی وزارت خارجہ کے ترجمان گو جیا کھون نے روزانہ کی پریس کانفرنس میں کمبوڈیا تھائی لینڈ سرحدی تنازعہ کے حوالے سے ایک سوال کے جواب میں کہا کہ کمبوڈیا اور تھائی لینڈ ایسے پڑوسی ہیں جو ایک دوسرے سے دور نہیں ہو سکتے۔

اچھی ہمسائیگی اور باہمی اعتماد پر قائم رہنا اور اختلافات کو مناسب طریقے سے طے کرن اکمبوڈیا اور تھائی لینڈ دونوں کے بنیادی اور طویل مدتی مفادات میں ہے اور یہ علاقائی امن و استحکام کے لیے اہم ہے۔ چین کمبوڈیا اور تھائی لینڈ کے تنازع کے نتیجے میں ہونے والے جانی نقصان پر گہرے دکھ اور دلی تعزیت کا اظہار کرتا ہے ۔

امید ہے کہ دونوں ممالک عوام کے مشترکہ مفادات کیلئے صبر و تحمل سے کام لیتے ہوئے جنگ بندی کریں گے، اختلافات کو پرامن طریقے سے بات چیت اور مشاورت کے ذریعے حل کریں گے اور سرحدی علاقے میں جلد از جلد امن و استحکام بحال کریں گے۔ ترجمان نے کہا کہ حالیہ دنوں میں آسیان نے کمبوڈیا اور تھائی لینڈ کے درمیان جنگ بندی کے عمل کو فعال طور پر فروغ دیا ہے ۔

چین ان تمام کوششوں کا خیرمقدم کرتا ہے جو صورتحال کو سازگار بنانے کیلئے کی جارہی ہیں۔ چین منصفانہ موقف کو برقرار رکھتے ہوئے کمبوڈیا اور تھائی لینڈ کے ساتھ قریبی رابطہ برقرار رکھے گا اور جنگ بندی کو فروغ دینے اور لڑائی کے خاتمے کے لیے تعمیری کردار ادا کرتا رہے گا۔