کم عمر افراد کے لئے کیپٹل مارکیٹس میں ٹریڈنگ اکاؤنٹ کھولنے کی گائیڈ لائنزجاری

اسلام آباد۔6نومبر (اے پی پی):پاکستان سٹاک ایکسچینج (پی ایس ایکس)نے نیشنل کلیئرنگ کمپنی آف پاکستان لمیٹڈ (این سی سی پی ایل ) اور سنٹرل ڈیپازٹری کمپنی آف پاکستان لمیٹڈ (سی ڈی سی ) کے ساتھ مل کر 18 سال سے کم عمر افراد کے لئے ٹریڈنگ اکاؤنٹ کھولنے کی گائیڈلائنز جاری کی ہیں۔ یہ اقدام سکیورٹیز اینڈ ایکسچینج کمیشن آف پاکستان کی رہنمائی میں تیار کیا گیا ہے۔یہ اقدام سرمایہ کاروں میں آگاہی اور مالی شمولیت کو فروغ دینے کی ایک اہم پیشرفت ہے۔ اس کا مقصد پاکستان کی نئی نسل میں بچت اور سرمایہ کاری کا رجحان پیدا کرنا، کم عمر افراد کو کیپٹل مار کیٹ میں جلد شامل کرنا، مالی نظم و ضبط سکھانا اور باضابطہ سرمایہ کاری کے مواقع تک رسائی دینا ہے۔

ان گائیڈ لائنز میں قدرتی یا عدالت کی طرف سے مقرر کردہ سرپرستوں کے ذریعے کیپٹل مارکیٹس میں کم عمر افراد کے اکاؤنٹس کھولنے اور چلانے کا واضح طریقہ، طریقہ کار، اور شرائط و ضوابط بتائے گئے ہیں۔ یہ نظام آسان رسائی کے ساتھ ساتھ قواعد کی پابندی اور کام کے تحفظ کو بھی یقینی بناتا ہے۔ مزید یہ کہ ان گائیڈ لائنز میں 18 سال کی عمر پوری ہونے پر اکاؤنٹ کو عام ٹریڈنگ اکاؤنٹ میں منتقل کرنے کا طریقہ بھی بیان کیا گیا ہے جس میں سرمایہ کی منتقلی پر لاگو ٹیکس کے اثرات بھی شامل ہیں۔یہ گائیڈ لائنز سرمایہ کاروں کی شمولیت بڑھانے اور مالی طور پر باخبر نئی نسل تیار کرنے کی ایک اہم پیشرفت ہیں۔ تفصیلی ہدایات پاکستان سٹاک ایکسچینج کی ویب سائٹ پر دیکھی جا سکتی ہیں۔