کپاس کے غیر روائتی علاقوں میانوالی، بھکر،لیہ اور سرگودھامیں جدید ٹیکنالوجی روشناس کروائی جارہی ہے،محکمہ زراعت

فیصل آباد۔ 13 مارچ (اے پی پی):نظامت زرعی اطلاعات محکمہ زراعت کے ترجمان نے کہا کہ کاشتکاروں کو جدید سفارشات سے بلحاظ علاقہ جات آگاہ کرنے کی ضرورت ہے اور اس مقصد کیلئے مختلف مقامات پر یوم کاشتکاراں کا اہتمام کیا جارہاہے جبکہ کپاس کے غیر روائتی علاقوں مثلاً میانوالی، بھکر،لیہ اور سرگودھا کے کاشتکاروں کو جدید ٹیکنالوجی سے روشناس کرانے کیلئے بھی ضروری اقدامات کئے جا رہے ہیں تاہم ضرورت اس امر کی ہے کہ میڈیا کے ذریعے عام کاشتکاروں کو جدید تحقیق سے آگاہ کیا جائے۔

انہوں نے کہاکہ کاشتکاروں کو مختلف فصلوں کے معیاری بیجوں کی بروقت فراہمی کیلئے ضروری اقدامات کئے گئے ہیں اور حکومت معیاری بیجوں کی فراہمی کیلئے بھر پور کوششیں کررہی ہے تاکہ زرعی پیداوار میں اضافہ کیا جاسکے۔ انہوں نے کہا کہ گندم کی فصل کی موجودہ صورت حال کافی بہتر ہے اور اگر موسمی حالات ساز گار رہے توللہ تعالیٰ کے فضل وکرم سے بھر پور پیداوار متوقع ہے نیز حکومت پنجاب کی کسان دوست پالیسیوں کی وجہ سے ملک گندم میں خود کفیل ہوگا۔

انہوں نے کہاکہ تجرباتی پلاٹوں سے جدید ٹیکنالوجی کے استعمال کے ذریعے بھر پور پیداوار حاصل کی جائے۔ انہوں نے کپاس کے کیڑوں اور بیماریوں کے انسداد کیلئے غیر کیمیائی طریقے اختیار کرنے کی ضرورت پر زور دیا اور کہا کہ محکمہ زراعت کے تمام شعبے پچھلے سال کی طرح جڑی بوٹیوں کی فوری تلفی کیلئے ایک بھر پور مہم کا آغاز کررہے ہیں تاکہ جڑی بوٹیوں کے انسداد کے ذریعے کیڑوں اور بیماریوں کی روک تھام کی جاسکے۔انہوں نے کہاکہ گزشتہ سال جڑی بوٹیوں کی بروقت تلفی سے اچھے نتائج برآمد ہوئے اورگندم کے علاوہ کپاس کی پیداوار میں بھی خاطر خواہ اضافہ ہوا۔

Short Link: https://urdu.app.com.pk/urdu/?p=571956