کیلین ایمباپے کی چیمپئنزفٹ بال لیگ میچ میں شرکت مشکوک، ریال میڈرڈ کے لئے مشکلات

میڈرڈ۔10دسمبر (اے پی پی):ریال میڈرڈ کے سٹار فٹ بالر کیلین ایمباپے کی چیمپئنز فٹ بال لیگ کے اہم میچ میں فٹنس مسائل کے باعث مانچسٹر سٹی کے خلاف شرکت مشکوک ہوگئی ہے۔ای ایس پی این کے مطابق کیلین ایمباپے نے فٹنس مسائل کے باعث ریال میڈرڈ کی ٹریننگ سیشن میں بھی حصہ نہیں لیا، جس کے بعد ان کی انجری کی نوعیت پر سوالات اٹھنے لگے ہیں۔کیلین ایمباپے کو پٹھوں کی چوٹ کا سامنا ہے اور ان کی صحت کے حوالے سے مزید ٹیسٹ کیے جائیں گے تاکہ یہ پتہ چل سکے کہ وہ مانچسٹر سٹی کے خلاف میچ میں شریک ہو سکیں گے یا نہیں۔

ریال میڈرڈ کی ٹیم اس وقت ایک مشکل صورتحال سے گزر رہی ہے، کیونکہ اس میچ سے پہلے ہی 8 اہم کھلاڑیوں کی غیر موجودگی کا سامنا ہے، جن میں دفاعی کھلاڑی ایڈر میلیتاؤ، ڈینی ہویسن، ڈیوڈ الابا، ڈینی کارواخال، ٹرینٹ ایلکسینڈر آرنولڈ اور فیرلینڈ منڈی شامل ہیں۔ ان کے علاوہ مڈفیلڈر ایڈورڈو کاما ونگا بھی انجری کی وجہ سے میچ سے باہر ہیں۔کیلین ایمباپے کی غیر موجودگی ریال میڈرڈ کے لیے ایک بڑا دھچکہ ہو سکتی ہے، کیونکہ وہ اس سیزن میں لا لیگا اور چیمپئنز لیگ میں ٹیم کے سب سے اہم کھلاڑی بن کر سامنے آئے ہیں۔

ریال میڈرڈ نے حالیہ پانچ میچوں میں سے صرف ایک فتح حاصل کی ہے، اور اس خراب کارکردگی نے آلونسو کو بھی مشکلات میں ڈال دیا ہے۔ خراب کارکردگی اور میچ کے نتائج کے بعد اب کلب کے حکام آلونسو کی جگہ نئے کوچ کی تلاش میں ہیں، اور یہ میچ ان کے مستقبل کا فیصلہ کن ہوگا۔کیلین ایمباپے کی کارکردگی اس سیزن میں ریال میڈرڈ کے لیے ایک روشن نقطہ رہی ہے، جہاں انہوں نے لا لیگا میں 16 گولز اور چیمپئنز لیگ میں 9 گولز کیے ہیں۔ اس وقت ریال میڈرڈ کی پوزیشن بہت ہی نازک ہے اور اس میچ میں کامیابی نہ صرف کیلین ایمباپے کی فٹنس پر بلکہ آلونسو کے مستقبل پر بھی اثر انداز ہو سکتی ہے۔