کین ولیمسن انگلینڈ کے خلاف پہلے ٹیسٹ کی پہلی اننگز میں نروس نائنٹیز کا شکار

کرائسٹ چرچ۔28نومبر (اے پی پی):نیوزی لینڈ کی مردوں کی کرکٹ ٹیم کے سابق کپتان اور مایہ ناز بلے باز کین ولیمسن انگلینڈ کی کرکٹ ٹیم کے خلاف تین میچوں کی سیریز کے کرائسٹ چرچ میں کھیلے جارہے ابتدائی ٹیسٹ میچ میں نروس نائنٹیز کا شکار ہوگئے اور وہ 7 رنز کے فرق سے اپنے ٹیسٹ کیریئر کی 33ویں سنچری مکمل کرنے میں ناکام رہے۔

جمعرات کو کین ولیمسن نے برطانوی ٹیم کے خلاف ہیگلے اوول، کرائسٹ چرچ میں کھیلے جارہے ابتدائی ٹیسٹ میچ کے پہلے روز شاندار بلے بازی کا مظاہرہ کیا اور مہمان ٹیم کے باولرز کی ایک نہ چلنے دی۔انہوں نے 62 کے مجموعی سکور پر ٹیم کے دووکٹوں کے گرنے کے بعد سنبھل کر بیٹنگ کرتے ہوئے ٹیم کے مجموعی سکور کو آگے بڑھانا شروع کیا اور 227 رنز تک پہنچا دیا، اس موقع پر کین ولیمسن کی اننگز کا خاتمہ ہوگیا اور وہ نروس نائنٹیز کا شکار ہوگئے ۔ 34 سالہ کین ولیمسن صرف 7 رنز کے فرق سے اپنے ٹیسٹ کیریئر کی 33 ویں سنچری مکمل کرنے سے محروم رہ گئے۔ کین ولیمسن کو 93کے انفرادی سکور پر گس اٹکنسن نے زیک کرولی کے ہاتھوں کیچ آئوٹ کیا۔