ہری پور پولیس کی کارروائی، 2 منشیات فروش رنگے ہاتھوں گرفتار

ایبٹ آباد۔ 26 فروری (اے پی پی):ہری پور پولیس نے ایک کارروائی کے دوران 2 منشیات فروشوں کو گرفتار کر کے ساڑھے 4 کلو سے زائد چرس برآمد کر لی۔ ہری پور پولیس کے مطابق ڈی پی او فرحان خان کی ہدایت پر منشیات سے پاک مہم کا سلسلہ جاری ہے۔

ایس ایچ او تھانہ حطار ساجد نواز نے پولیس نفری کے ہمراہ کارروائی کرتے ہوئے منشیات فروشی میں ملوث ابرار احمد ولد ذوالفقار سکنہ حطار کو گرفتار کر کے قبضہ سے 2 کلو 655 گرام چرس اور خان محمد ولد عبدالجبار سکنہ ایبٹ آباد کو گرفتار کر کے قبضہ سے 2 کلو 255 گرام چرس برآمد کر لی۔ ملزمان کے خلاف مقدمات درج کر کے تفتیش شروع کر دی گئی ہے۔

Short Link: https://urdu.app.com.pk/urdu/?p=566458