برن۔10جولائی (اے پی پی):فرانس اور انگلینڈ کی ویمنز فٹ بال ٹیموں نے اپنی عمدہ کارکردگی کی بدولت یوئیفا ویمنز فٹ بال چیمپئن شپ میں اپنے اپنے میچز جیت لئے ۔ دونوں ٹیموں نے اپنے گروپ ڈی کے میچز جیتے ۔ فرانس کی ٹیم نے اپنا مسلسل دوسرا میچ جیت لیا ،اس فتح کے ساتھ ہی فرانسیسی ویمنز ٹیم نے ٹاپ 16 رائونڈ کے لئے بھی کوالیفائی کرلیاہے ۔
فرانس کی ویمن ٹیم نے گروپ ڈی کے اپنے دوسرے میچ میں حریف ویلز کی ویمن فٹ بال ٹیم کو شکست دی ۔ انگلینڈکی ویمن ٹیم نے حریف نیدرلینڈز کی ٹیم کو ہرا دیا۔یوئیفا ویمنز فٹ بال چیمپئن شپ کے انتہائی دلچسپ اور کانٹے دار مقابلے سوئٹزرلینڈ میں جاری ہیں۔کیبن پارک، سینٹ گیلن، سوئٹزرلینڈمیں کھیلے گئے گروپ ڈی کے دوسرے میچ میں فرانس اور ویلز کی ویمنز ٹیمیں آمنے سامنے تھیں جس میں فرانس کی ویمن ٹیم نے انتہائی شاندار کارکردگی کا مظاہرہ کرتے ہوئے حریف ویلز کی ویمن ٹیم کو 1-4گول سے نہ صرف ہرا دیا بلکہ چیمپئن شپ کے پری کوارٹر فائنل کے لئے بھی کوالیفائی کرلیا۔
فرانس کی جانب سے کلارا میٹیو،کدیدیاتو دیانی،امل ماجری اورگریس گیورو نے ایک، ایک گول کر کے اپنی ٹیم کو فتح دلائی۔ویلز کی جانب سے واحد گول جیس فش لاک نے میچ کے 13 ویں منٹ پر سکور کیا۔اسی گروپ کے سٹیڈیون ،لیٹزیگرنڈ، زیورخ، سوئٹزرلینڈ میں کھیلے گئے دوسرے میچ میں انگلینڈ اور نیدرلینڈز کی ویمنز ٹیمیں آمنے سامنے تھیں جس میں انگلینڈ کی ٹیم نے عمدہ کھیل پیش کرتے ہوئے حریف نیدرلینڈز کی ٹیم کو با آسانی 0-4 گول سے ہرا دیا۔ انگلینڈ کی طرف سے لارین جیمز نے 2 جبکہ جارجیا سٹین وے اور ایلا ٹون نے ایک ایک گول کر کے اپنی ٹیم کو فتح دلا دی۔
