یورپ روس کے ساتھ ممکنہ جنگ کی تیاری کر رہا ہے،سربیا

بلغراد۔12نومبر (اے پی پی):سربیا کے صدر الیگزینڈر وُوچچ نے کہا ہے کہ یورپی ممالک روس کے ساتھ ممکنہ فوجی تصادم کی تیاریوں میں مصروف ہیں۔ تاس کے مطابق انہوں نے کہا کہ صورتحال دن بدن واضح ہوتی جا رہی ہے کہ یورپ اور روس کے درمیان جنگ کے امکانات بڑھ رہے ہیں۔صدرالیگزینڈر وُوچچ نے کہا کہ جب میں حقائق کا جائزہ لیتا ہوں تو اس نتیجے پر پہنچتا ہوں کہ یورپ اور روس کے درمیان جنگ کے آثار نمایاں ہیں۔

یہ محض باتیں نہیں ہیں — ہر کوئی اس کے لیے تیاری کر رہا ہے۔انہوں نے فرانسیسی افواج کے چیف آف اسٹاف جنرل فابین مانڈون کے اس بیان پر تبصرہ کرتے ہوئے کہا کہ فرانسیسی فوج کو آئندہ تین سے چار سال میں روس کے ساتھ ممکنہ تصادم کے لیے تیار رہنے کی ہدایت دی گئی ہے۔الیگزینڈر وُوچچ نے مزید کہا کہ سربیا ایک مشکل پوزیشن میں ہے کیونکہ مغربی ممالک اور روس کے متضاد مقاصد کے درمیان اسے توازن قائم رکھنا ہے۔ ان کے مطابق، ’’سربیا کو اپنی مسلح افواج کو مضبوط کرنا ہوگا تاکہ وہ اپنی خود دفاعی صلاحیت کو برقرار رکھ سکے۔