سینٹورس مال میں جاری متبرکات کی نمائش میں 15 جولائی تک توسیع

اسلام آباد ۔ 3 جولائی (اے پی پی) کشمیر کمیٹی کے چیئرمین اور وزیرمملکت برائے انسداد منشیات و سیفران شہر یار خان آفریدی کی تجویز پر سینٹورس مال میں جاری متبرکات کی نمائش میں 15 جولائی تک توسیع کر دی گئی۔ تفصیلات کے مطابق کشمیر کمیٹی کے چیئرمین شہر یار خان آفریدی نے جمعہ کو سینٹورس مال کا دورہ کیا اور غلاف کعبہ، پردہ باب الکعبہ، چادر روضہ رسول و دیگر مقدس نوادرات و متبرکات کی نمائش دیکھی۔ شہر یار خان آفریدی متبرکات کے روح پرور اور متاثر کن مناظر دیکھ کر بہت خوش ہوئے اور کورونا وبا کے چیلنجز کے باوجود ایونٹ کے کامیاب انعقاد پر سینٹورس مال کی انتظامیہ کو مبارکباد دی۔ انہوں نے اس امر پر خصوصی اطمینان کا اظہار کیا کہ سینٹورس مال کی طرف سے کورونا وبا سے بچاو¿ کیلئے حکومت کے مقرر کردہ تمام ایس او پیز پر سختی سے عملدرآمد کیا جا رہا ہے۔ وزیر مملکت کو ان احتیاطی اقدامات اور انتظامی میکنزم سے متعلق بریف کیا گیا جن پر سینٹورس مال کی جانب سے حفظان صحت کیلئے کئے عمل کیا جا رہا ہی۔ اس موقع پر گفتگو کرتے ہوئے وزیر مملکت شہریار خان آفریدی نے کہا کہ موجودہ حالات میں جب سفری پابندیوں کے باعث لوگ خانہ کعبہ، روضہ رسول و دیگر مقدس مقامات پر نہیں جا سکتے، غلاف کعبہ و دیگر اسلامی متبرکات کی زیارت کے ذریعے انہیں روحانی سکون حاصل کرنے کا موقع فراہم کیا گیا ہے۔ چیئرمین پنجاب سرمایہ کاری بورڈ سردار تنویر الیاس خان کی یہ کاوش لائق تحسین ہے۔ انہوں نے کہا کہ سینٹورس مال کی انتظامیہ نے اس نمائش کا انعقاد کر کے شاندار قدم اٹھایا ہے، یہ نمائش انتہائی روحانی اہمیت کی حامل ہے کیونکہ اس کا مقصد جڑواں شہروں کے وبا سے پریشان لوگوں کو سکون و اطمینان فراہم کرنا ہے۔ بڑھتے ہوئے اضطراب اور بے یقینی کی فضا میں نمائش کے مقدس مناظر دیکھ کر لوگوں کو روحانی سکون ملے گا۔ شہر یار آفریدی نے سینٹورس مال کی انتظامیہ پر زور دیا کہ نمائش میں توسیع کر دی جائے اور لوگوں کو متبرکات کی زیارت کا مزید موقع فراہم کیا جائے۔ انہوں نے کہا کہ یہ نمائش عوام میں بہت مقبول ہوئی ہے اور بہت سے لوگ اسے دیکھنے کیلئے آنا چاہتے ہیں۔ سینٹورس مال کی انتظامیہ نے چیئرمین کشمیر کمیٹی کی تجویز پر فوری عمل کرتے ہوئے نمائش میں 15 جولائی تک توسیع کا اعلان کر دیا۔ 24 جون سے جاری نمائش میں اب تک ہزاروں افراد متبرکات کی زیارت کر چکے ہیں۔ ملک کے دوردراز شہروں سے بھی لوگ نمائش دیکھنے کے لئے سینٹورس آتے ہیں۔ اس موقع پر میڈیا سے گفتگو کرتے ہوئے شہریار آفریدی نے کہا کہ کشمیر میں ظلم اور بربریت ہے ۔انہوں نے مزید کہا کہ اقلیتوں کا تحفظ، ان کی نقل و حرکت حکومت کی ذمے داری ہے، اسٹیک ہولڈرز کے ساتھ مشورہ کر کے اس مسئلے کا حل نکالیں گے۔ وزیرِ مملکت برائے انسدادِ منشیات شہریار آفریدی نے کہا کہ اگلے سال سے ایک تعلیمی نصاب پورے ملک میں نافذ ہونے جا رہا ہے۔