نیویارک۔20ستمبر (اے پی پی):وزیراعظم محمد شہباز شریف سے اقوام متحدہ کی جنرل اسمبلی کے 77ویں اجلاس کے موقع پر آسٹریا کے وفاقی چانسلر کارل نیہامر نے ملاقات کی ہے۔
منگل کو وزیراعظم آفس کے میڈیا ونگ سے جاری بیان کے مطابق ملاقات کے دوران دوطرفہ تعلقات اور مختلف شعبوں میں باہمی تعاون کو مزید مستحکم کرنے کے طریقوں پر تبادلہ خیال کیا گیا۔ اس موقع پر وزیر خارجہ بلاول بھٹو زرداری، وزیر خزانہ مفتاح اسماعیل، وفاقی وزیر برائے اطلاعات و نشریات مریم اورنگزیب، وزیر مملکت برائے خارجہ امور حنا ربانی کھر اور وزیراعظم کے معاون خصوصی طارق فاطمی بھی موجود تھے ۔
