اسلام آباد۔2جنوری (اے پی پی):سابق سیکرٹری خارجہ سہیل محمود نے انسٹی ٹیوٹ آف اسٹریٹجک سٹڈیز اسلام آباد (آئی ایس ایس آئی) کے ڈائریکٹر جنرل کا چارج سنبھال لیا۔
پیر کو یہاں جاری پریس ریلیز کے مطابق ایمبیسڈر سہیل محمود نے انسٹی ٹیوٹ آف اسٹریٹجک سٹڈیز کے سبکدوش ہونے والے ڈائریکٹر جنرل سفیر اعزاز احمد چوہدری کی مدت ملازمت پوری ہونے پر عہدہ سنبھالا ہے۔ ایمبیسڈر سہیل محمود سفارت کاری اور اعلیٰ سطحی فیصلہ سازی کا وسیع تجربہ رکھتے ہیں۔ انہوں نے تقریباً 37 سال تک پاکستان کی وزارت خارجہ میں خدمات انجام دیں اور سیکرٹری خارجہ کے عہدے پر فائز ہوئے، وہ اپریل 2019 سے ستمبر 2022 تک اس عہدے پر خدمات انجام دیتے رہے۔
اس سے پہلے وہ 19-2017 تک بھارت میں پاکستان کے ہائی کمشنر تھے۔ اس سے قبل انہوں نے ترکی میں (17-2015) اور تھائی لینڈ میں (13-2009) کے دوران بطور سفیر خدمات انجام دیں۔ وہ ایڈیشنل سیکرٹری (افغانستان/مغربی ایشیا) اور ڈائریکٹر جنرل (امریکہ) اور ڈائریکٹر جنرل (فارن سیکرٹری آفس) کے طور پر بھی کام کرچکے ہیں۔ اپنے سفارتی کیریئر کے آغاز میں انہوں نے انقرہ اور واشنگٹن ڈی سی میں پاکستانی سفارت خانوں اور نیویارک میں اقوام متحدہ میں پاکستان کے مستقل مشن میں بطور قونصلر خدمات انجام دیں۔
وہ ڈائریکٹر (ایران اور ترکی) کے طور پر بھی خدمات انجام دے چکے ہیں۔ ایمبیسڈر سہیل محمود نے کولمبیا یونیورسٹی نیویارک سے انٹرنیشنل افئیرز میں ماسٹرز کی ڈگری اور قائداعظم یونیورسٹی اسلام آباد سے تاریخ میں ماسٹرز کی ڈگری حاصل کر رکھی ہے۔
Short Link: https://urdu.app.com.pk/urdu/?p=344440
