لاہور۔12جنوری (اے پی پی):وزیراعلی پنجاب محسن نقوی نے پی آئی سی کی نئی ایمرجنسی کا دورہ کیا۔وزیر اعلی محسن نقوی نے نئی ایمرجنسی میں صفائی کے ناقص انتظامات اور ٹائلز وکاؤنٹرزپر مٹی،داغ و دھبے دیکھ کر ناراضگی کا اظہار کیا۔
وزیراعلی محسن نقوی نے کنٹریکٹر،محکمہ تعمیرات ومواصلات کے حکام اور ایم ایس کو فوری طلب کر لیا۔ وزیراعلی محسن نقوی نے صفائی کے ناقص انتظامات اور ٹائلز پر مٹی کے نشانات دکھائے اور صفائی کی صورتحال پر برہمی کا اظہار کیا۔ وزیر اعلی محسن نقوی نے کہا کہ ایم ایس صاحب صفائی کی صورتحال اتنی خراب کیوں ہے؟نئی ایمرجنسی میں صفائی انتظامات کسی طور پر بھی تسلی بخش نہیں۔
وزیراعلی محسن نقوی نے فوری طور پر کمشنر کو بھی بلا لیا اور صفائی کے انتظامات کو بہتر بنانے کی ہدایت کی۔ انہوں نے کہا کہ صفائی انتظامات کو فی الفور بہتر بنانے کی ضرورت ہے اور نئی ایمرجنسی میں صفائی کی یہ صورتحال کسی صورت قابل برداشت نہیں۔
وزیراعلی محسن نقوی نے وہیل چیئر پر مریض کی خیریت دریافت کی اور علاج معالجے کی سہولتوں کے بارے میں دریافت کیا۔ وزیراعلی محسن نقوی نے فرش پر گری ہوئی فائل اٹھا کر وہیل چیئر پر موجود مریض کو دی جس پر مریض نے وزیراعلی محسن نقوی کا شکریہ ادا کیا۔
وزیراعلی محسن نقوی نے گجرات کی رہائشی خاتون کی جانب سے انجیوگرافی کیلئے وقت دینے میں تاخیر کی شکایت کافوری نوٹس لیتے ہوئے انجیوگرافی جلد کرانے کا حکم دیا اور موقع پر ہی ایم ایس کو احکامات جاری کئے۔ سیکرٹری صحت اور متعلقہ حکام بھی ہمراہ تھے۔
