پیرس اولمپکس کے مینز والی بال ایونٹ میں ہفتے کو 4میچوں کا فیصلہ ہوگا

پیرس۔26جولائی (اے پی پی):پیرس اولمپکس گیمز میں شائقین کو انتہائی دلچسپ اور کانٹے دار مقابلے دیکھنے کو ملیں گے۔ مردوں کے والی بال ایونٹ میں 27جولائی کو 4میچز کھیلے جائیں گے۔دومیچز گروپ بی سے ہوں گے جبکہ دو میچز گروپ سی کے کھیلے جائیں گے۔

گروپ بی کا پہلا میچ اٹلی اور برازیل کی ٹیموں کے درمیان کھیلا جائے گاجبکہ دوسرا میچ پولینڈ اور مصرا کی ٹیموں کے درمیان کھیلا جائے گا ۔ اسی طرح گروپ سی کا پہلا میچ جاپان اور جرمنی کی والی بال ٹیموں کے درمیان کھیلاجائے گا جبکہ اسی گروپ کے دوسرے میچ میں امریکا اور ارجنٹائن کی والی بال ٹیمیں آمنے سامنے ہوں گی ۔مردوں کے والی بال ایونٹ میں 12 ٹیموں کو تین گروپس میں تقسیم کیا گیا ہے ۔ گروپ اے میں میزبان فرانس،سلووینیا،کینیڈا اور سربیا شامل ہیں۔

گروپ بی میں پولینڈ،اٹلی،برازیل اور مصر کی ٹیمیں شامل ہیں جبکہ گروپ سی میں جاپان،امریکا،ارجنٹائن اور جرمنی کی ٹیموں کو رکھا گیا ہے ۔ مینز والی بال ایونٹ کے چاروں کوارٹر فائنلز 5 اگست کو کھیلے جائیں گے،سیمی فائنلز 7 اگست کو کھیلے جائیں گے ، تیسری پوزیشن کے لئے میچ 9 اگست کو کھیلا جائے گا جبکہ طلائی تمغہ کے لئے میچ بھی10اگست کو کھیلا جائے گا۔