الیگزینڈر زویروف اور کارلوس الکاراز نے اے ٹی پی فائنلزمیں اپنے اپنے میچز جیت لئے

روم۔14نومبر (اے پی پی):جرمنی کے شہرہ آفاق ٹینس سٹار اور عالمی نمبر ٹو الیگزینڈر زویروف اور سپین کے نامور ٹینس سٹار اور عالمی تھری کارلوس الکاراز نے اپنی شاندار کارکردگی کی بدولت اے ٹی پی فائنلز کے گروپ مرحلے میں اپنے اپنے میچز جیت لئے ۔27 سالہ جرمن ٹینس سٹار ،عالمی نمبر ٹو الیگزینڈر زویروف نے اے ٹی پی فائنلز میں مردوں کے سنگلز مقابلوں کے دوسرے میچ میں ناروے کے حریف کھلاڑی کیسپر رڈ کو شکست دی جبکہ سپین کے 21 سالہ ٹینس سٹار کارلوس الکاراز نے عمدہ کھیل پیش کرتے ہوئے روس کے ٹینس کھلاڑی آندرے روبلوف کو شکست دے کر اے ٹی پی فائنلز میں پہلی فتح حاصل کی ۔

اے ٹی پی فائنلز گروپ میچز اٹلی کے شہر ٹورن کے انالپی ایرینامیں جاری ہیں۔ اے ٹی پی فائنلز کے گروپ مرحلے میں مردوں کے سنگلز مقابلوں کے دوسرے میچ میں27 سالہ جرمن ٹینس سٹار الیگزینڈر زویروف نے عمدہ کھیل پیش کرتے ہوئے ناروے کے حریف کھلاڑی کیسپر رڈ کو ٹائی بریک پر سٹریٹ سیٹس میں 6-7(3-7) اور3-6 سے ہرا کر اے ٹی پی فائنلز میں مسلسل دوسری فتح حاصل کرلی ۔

ایک اور میچ میں سپین کے 21 سالہ ٹینس سٹار کارلوس الکاراز نے شاندار کارکردگی کا مظاہرہ کرتے ہوئے روس کے حریف ٹینس کھلاڑی آندرے روبلوف کو سٹریٹ سیٹس میں ٹائی بریک پر 3-6 اور 6-7(8-10) سے شکست دے کر اے ٹی پی فائنلز میں پہلی فتح حاصل کی ۔