روم۔18نومبر (اے پی پی):اٹلی کےشہرہ آفاق ٹینس سٹار اور عالمی نمبر ون جینک سنرنے اپنی شاندار کارکردگی کی بدولت اے ٹی پی فائنلز ٹورنامنٹ جیت لیا۔
23 سالہ اطالوی ٹینس سٹار ،عالمی نمبر ون اور ٹاپ سیڈڈ جینک سنر نے اے ٹی پی فائنلز میں مردوں کے سنگلز مقابلوں کے فائنل میچ میں امریکا کے 27 سالہ ٹینس سٹار ٹیلر فریٹز کو نہ صرف شکست دی بلکہ اے ٹی پی فائنلز کا ٹائٹل جیتنے والے پہلے اطالوی کھلاڑی بھی بن گئے ۔ اے ٹی پی فائنلز گروپ میچز اٹلی کے شہر ٹورن کے انالپی ایرینامیں جاری ہیں۔
اے ٹی پی فائنلز کے گروپ مرحلے میں مردوں کے سنگلز مقابلوں کے فائنل میچ میں23 سالہ اٹلی کے ٹینس سٹار جینک سنر نے عمدہ کھیل پیش کرتے ہوئے امریکا کے ٹیلر فریٹز کو سٹریٹ سیٹس میں 4-6 اور 4-6 سے شکست دے کر ٹورنامنٹ جیت لیا۔جینک سنر اے ٹی پی فائنلز کا ٹائٹل جیتنے والے پہلے اطالوی کھلاڑی بن گئے ہیں۔ عالمی نمبر ایک جینک سنر نے شاندار سال گزارا ہے ، جس میں انہوں نے اپنے کیریئر کے پہلے دو گرینڈ سلام سلام ٹائٹلز بھی جیتے ہیں۔
اس فتح کے ساتھ وہ 1986 میں ایوان لینڈل کے بعد کوئی سیٹ ہارے بغیر سیزن کے اختتامی اے ٹی پی فائنلز میں ٹائٹل جیتنے والے پہلے کھلاڑی بن گئے ہیں ۔اے ٹی پی فائنلز کا ٹائٹل جیتنے کے بعد جینک سنر نے میڈیا سے بات چیت کرتے ہوئے کہا کہ یہ اٹلی میں میرا پہلا ٹائٹل ہے اور یہ میرے لیے بہت زیادہ معنی رکھتا ہے، جسے میں کبھی فراموش نہیں کر سکتا۔سنر نے کہامیں اپنی اس فتح پر بہت خوش ہوں اور مستقبل میں بھی اپنی عمدہ کارکردگی کے تسلسل کو برقرار رکھتے ہوئے مزید فتوحات حاصل کروں گا
