پاکستان شاہینز سری لنکا اے کے خلاف چار روزہ میچ کے تیسرے دن اپنی پہلی اننگز میں 287 رنز بنا کر آؤٹ ہو گئی

راولپنڈی۔20نومبر (اے پی پی):پاکستان شاہینز سری لنکا اے کے خلاف چار روزہ میچ کے تیسرے دن اپنی پہلی اننگز میں 287 رنز بنا کر آؤٹ ہو گئی اور اسے 23 رنز خسارے کا سامنا کرنا پڑا، احمد صفی عبداللہ 39 رنز بنا کر نمایاں رہے ، ونوجا ساہن نے 5 وکٹیں حاصل کیں ، سری لنکا اے نے کھیل کے اختتام پر اپنی دوسری اننگز میں 4 وکٹوں کے نقصان پر 157 رنز بنا کر 180 رنز کی مجموعی برتری حاصل کر لی ، پون رتھنائیکے 64 اور سونال دنوشا 51 رنز کے ساتھ وکٹ پر موجود ہیں ، احمد بشیر نے دو وکٹیں حاصل کیں ،

راولپنڈی کرکٹ اسٹیڈیم میں جاری میچ کے تیسرے روز پاکستان شاہینز نے 212 رنز 5 کھلاڑی آؤٹ پر اننگز دوبارہ شروع کی تو باقی ماندہ کھلاڑی مجموعی اسکور میں 75 رنز کا اضافہ کر سکے ، حسین طلعت چھٹے آؤٹ ہونے والے کھلاڑی تھے جو 25 رنز بنا کر سونال دنوشا کی گیند پر ایل بی ڈبلیو ہو گئے، غازی غوری کو ونوجا ساہن نے 15 کے انفرادی اسکور پر ایل بی ڈبلیو کیا، احمد صفی عبداللہ 39 رنز بنا کر ونوجا ساہن کا نشانہ بنے ، انہوں نے کاشف علی کے ساتھ آٹھویں وکٹ کی شراکت میں 53 رنز کا اضافہ کیا ، ونوجا ساہن نے کاشف علی کو 14 رنز پر آؤٹ کر کے اننگز میں اپنی پانچویں وکٹ حاصل کی، خرم شہزاد انجری کی وجہ سے بیٹنگ کے لیے نہ آسکے، انہیں فیلڈنگ کے دوران دائیں ہاتھ پر گیند لگی تھی اور وہ اس میچ میں مزید حصہ نہیں لے سکیں گے،

اس طرح پاکستان شاہینز 287 رنز بنا کر آؤٹ ہو گئی، ونوجا ساہن نے شاندار باؤلنگ کا مظاہرہ کیا اور 74 رنز کے عوض 5 وکٹیں حاصل کیں، سری لنکا اے نے کھیل کے اختتام پر 4 وکٹوں کے نقصان پر 157 رنز بنا لیے اور اسے مجموعی طور پر 180 رنز کی برتری حاصل ہو گئی ہے ، 46 کے مجموعی اسکور پر 4 وکٹیں گر جانے کے بعد پورن رتھنائیکے اور سونال دنوشا نے ذمہ داری سے بیٹنگ کی اور پانچویں وکٹ میں 111 رنز کی ناقابل شکست شراکت قائم کر کے ٹیم کو مشکلات سے نکالا، پون رتھنائیکے 64 اور سونال دنوشا 51 رنز کے ساتھ وکٹ پر موجود ہیں، احمد بشیر نے دو جبکہ کاشف علی اور حسین طلعت نے ایک، ایک وکٹ حاصل کی ۔