بھارتی ٹیم کو پہلے ٹیسٹ میچ میں شکست دیکر سیریز کا آغاز فاتحانہ انداز میں کریں گے، ٹراوس ہیڈ

پرتھ۔21نومبر (اے پی پی):آسٹریلوی کرکٹ ٹیم کے مایہ ناز اوپننگ بلے باز ٹراوس ہیڈ نے کہا ہے کہ مہمان بھارتی ٹیم کو ٹیسٹ میچ میں شکست دیکر بارڈر؍گواسکر سیریز کا آغاز فاتحانہ انداز میں کریں گے۔

30 سالہ ٹراوس ہیڈ نے کہا کہ بھارت کے خلاف پانچ میچوں کی ٹیسٹ سیریز کے لئے ان کی ٹیم بھرپور تیاریوں میں مصرف ہے ۔

انہوں نے کہا کہ بھارتی ٹیم کا شمار دنیائے کرکٹ کی بہترین ٹیموں میں ہوتا ہے اور اس کو شکست دینا آسان نہیں ہے تاہم ان کی ٹیم نے ہوم سیریز کے ابتدائی میچ سے قبل بھرپور تیاری کر رکھی ہے ۔

انہوں نے کہا کہ ان کی ٹیم میں ایسے کھلاڑی موجود ہیں جو کسی بھی وقت میچ کا پانسہ پلٹنے کی صلاحیت رکھتے ہیں۔ اپنے ایک بیان میں انہوں نے کہا کہ وہ بھارت کے خلاف بارڈر ،گواسکر سیریز کے ابتدائی ٹیسٹ میچ میں شاندار کارکردگی کا مظاہرہ کرتے ہوئے اپنی ٹیم کی فتح میں اہم کردار ادا کریں گے۔

ٹراوس ہیڈ نے کہا کہ وہ مکمل طور پر فٹ ہیں اور مہمان ٹیم کے خلاف پانچ ٹیسٹ میچوں کی سیریز کے پہلے میچ میں شرکت کے لئے بے تاب ہیں۔

ایک سوال کے جواب میں انہوں نے کہا کہ بھارتی ٹیم کو ابتدائی میچ میں شکست دیکر پانچ ٹیسٹ میچوں کی سیریز کا آغاز فاتحانہ انداز میں کریں گے ۔

انہوں نے اپنی ٹیم کو خبردار کرتے ہوئے کہا کہ بھارتی ٹیم کے خلاف سیریز میں کامیابی کے لئے ٹیم کو تینوں شعبوں میں سو فیصد کارکردگی کا مظاہرہ کرنا ہوگا۔واضح رہے کہ آسٹریلیا اور بھارت کی ٹیموں کے درمیان پہلا ٹیسٹ میچ کل جمعے سے پرتھ میں شروع ہوگا۔