قائد اعظم ٹرافی کرکٹ ٹورنامنٹ کے پانچویں راؤنڈ کے آخری روز فیصل آباد ، ایبٹ آباد ، سیالکوٹ ، بہاولپور اور پشاور نے اپنے اپنے میچ جیت لیے

راولپنڈی۔22نومبر (اے پی پی):قائد اعظم ٹرافی کرکٹ ٹورنامنٹ کے پانچویں اور آخری راؤنڈ کے آخری روز فیصل آباد ، ایبٹ آباد ، سیالکوٹ ، بہاولپور اور پشاور نے اپنے اپنے میچ جیت لیے ۔شعیب اختر سٹیڈیم راولپنڈی میں پشاور نے راولپنڈی کے خلاف دلچسپ مقابلے کے بعد 26 رنز سے کامیابی حاصل کی۔راولپنڈی کو میچ جیتنے کے لیے241 رنز کا ہدف ملا تھا لیکن پوری ٹیم 214 رنز بنا کر آؤٹ ہو گئی۔عمر امین 65 رنز کے ساتھ ٹاپ اسکورر رہے ، نیاز خان اور معاذ صداقت نے تین ، تین وکٹیں حاصل کیں۔

میرپور سٹیڈیم میں سیالکوٹ نے کراچی بلوز کو 8 وکٹوں سے ہرا دیا۔سیالکوٹ کو جیت کے لیے 99 رنز کا ہدف ملا تھا جو اس نے 2 وکٹوں کے نقصان پر حاصل کر لیا۔ اس سے قبل کراچی بلوز دوسری اننگز میں 224 رنز بنا کر آؤٹ ہو گئی۔سیف اللہ بنگش نے 105 رنز کی ناقابل شکست اننگز کھیلی ، محمد علی نے 5 وکٹیں حاصل کیں۔نیشنل گراؤنڈ میں فیصل آباد نے اسلام آباد کو 247 رنز سے شکست دے دی۔اسلام آباد کی ٹیم 396 رنز کے ہدف کے تعاقب میں 148 رنز بنا کر آؤٹ ہو گئی، شہزاد گل اور اسد رضا نے چار ، چار کھلاڑیوں کو آؤٹ کیا ۔ ایبٹ آباد سٹیڈیم میں بہاولپور نے کراچی وائٹس کو 198 رنز سے ہرا دیا۔کراچی وائٹس کو جیت کے لیے 301 رنز کا ہدف ملا تھا لیکن وہ صرف 102 رنز بنا سکی، مہران سانول نے 5 وکٹیں حاصل کیں۔ڈائمنڈ گراؤنڈ میں کھیلے گئے میچ میں ایبٹ آباد نے حیدر آباد کو 249 رنز سے ہرا دیا، حیدر آباد کی ٹیم 345 رنز کے ہدف کے تعاقب میں صرف 95 رنز پر ڈھیر ہو گئی ، آفتاب احمد نے 5 کھلاڑیوں کو آؤٹ کیا ۔

اس سے قبل ایبٹ آباد نے اپنی دوسری اننگز میں 369 رنز بنائے ، شہاب خان 61 رنز بنا کر ناٹ آؤٹ رہے، شہریار بلوچ نے عمدہ باؤلنگ کا مظاہرہ کیا اور 8 وکٹیں حاصل کیں ۔پانچویں راؤنڈ کے اختتام پر تینوں گروپ کے پوائنٹس ٹیبل پر سرفہرست ٹیموں نے سنگل لیگ کی بنیاد پر کھیلے جانے والے سہ فریقی مرحلے کے لیے کوالیفائی کر لیا ہے جس کا آغاز 26 نومبر سے ہو گا ۔ان ٹیموں میں گروپ اے سے لاہور وائٹس ( 99 پوائنٹس ) گروپ بی سے پشاور ( 89 پوائنٹس ) اور گروپ سی سے سیالکوٹ ( 90 پوائنٹس ) شامل ہیں۔