اسلام آباد۔21فروری (اے پی پی):ملک میں ضروری اشیا کی قیمتوں میں ہفتہ وار بنیادوں پر 0.27 فیصد جبکہ سالانہ بنیادوں پر 1.21 فیصد کا اضافہ ریکارڈ کیا گیا ہے۔ پاکستان بیورو برائے شماریات کے اعداد و شمار کے مطابق 20 فروری کو ختم ہونے والے ہفتہ میں صارفین کیلئے قیمتوں کا حساس اشاریہ 319.12 پوائنٹس ریکارڈ کیا گیا جو پیوستہ ہفتہ کے مقابلہ میں 0.27 فیصد زیادہ ہے۔ پیوستہ ہفتہ میں صارفین کیلئے قیمتوں کا حساس اشاریہ 318.26 پوائنٹس ریکارڈ کیا گیا تھا۔ اعداد و شمار کے مطابق گذشتہ ہفتہ کے دوران روزمرہ استعمال کی 16 ضروری اشیاء کی قیمتوں میں کمی اور 24 کی قیمتوں میں استحکام رہا۔
اس کے برعکس 11 اشیا کی قیمتوں میں اضافہ ہوا۔ ہفتہ رفتہ میں ٹماٹر کی قیمت میں 2.81 فیصد، ڈیزل 1.49 فیصد، دال چنا 1.24 فیصد، پیاز 1.16 فیصد، آلو 0.90 فیصد، دال ماش 0.60 فیصد، ایل پی جی 0.58 فیصد، پٹرول 0.36 فیصد، باسمتی چاول 0.34 فیصد، ایک کلو بناسپتی گھی 0.32 فیصد اور دال مونگ کی قیمت میں 0.30 فیصد کی کمی ہوئی۔ اس کے برعکس کیلے کی قیمت میں 11.89 فیصد، انڈے 7.80 فیصد، چکن 4.47 فیصد، لہسن 1.08 فیصد، چینی 0.65 فیصد، بیف 0.52 فیصد، سگریٹس 0.49 فیصد، مٹن 0.22 فیصد، دال مسور 0.15 فیصد اور واشنگ سوپ کی قیمت میں 0.07 فیصد کا اضافہ ہوا۔
سب سے کم یعنی 17 ہزار 732 روپے ماہوار آمدنی رکھنے والے گروپ کیلئے قیمتوں کے حساس اشاریہ میں ہفتہ وار بنیادوں پر 0.19 فیصد کا اضافہ ہوا۔ 17 ہزار 733 روپے سے لے کر 22 ہزار 888 روپے، 22 ہزار 889 روپے سے لے کر 29 ہزار 517 روپے، 29 ہزار 518 روپے سے لے کر 44 ہزار 175 روپے اور اس سے زیادہ آمدنی والے رکھنے والے گروپوں کیلئے قیمتوں کے حساس اشاریہ میں بالترتیب 0.23 فیصد، 0.24 فیصد، 0.28 فیصد اور 0.28 فیصد کا اضافہ ہوا۔ صارفین کیلئے قیمتوں کے حساس اشاریہ کا تعین ملک کے 17 بڑے شہروں کی 50 مارکیٹوں میں 51 ضروری اشیاء کی قیمتوں میں ردوبدل کی بنیاد پر کیا جاتا ہے۔
Short Link: https://urdu.app.com.pk/urdu/?p=564472
